Tuidam-a ruhro hmuhte kum za vel liam taa a ruala phum an ni - report

Aizawl | January 6, 2021: Tuidam leh Kawrtethawveng khaw inkar, kawng laih thar kawng chhak leimin kara mihring ruhro hmuhchhuah chu Sawrkarin ti tura a bituk angin Mizoram Forensic Science Laboratory-a hnathawk te chuan hun bi tiam chhungin an zirchiang a, an thil hmuh dan report chu  Sawrkarah October 27, 2020 khan an theh lut.





September 2 leh 3, 2020 khan ruhro hmuhchhuahna hmunah zirchiang turin Forensic Team te hi an kal a, chumi hnuah chiang zawka exam a nih theih nan ruhro te chu Forensic Laboratory lamah hawn a ni a. Ruhro awm ang ang atanga Forensic Expert te thil hmuh chhuah tlangpui chu hetiang hian Forensic Science Laboratory chuan an tarlang a ni:-
Ruhro te hi mihring 18 ruhro ngei a ni tih finfiah a ni a. Kum 18 atanga kum 32 (+- kum 3) inkara upa engemaw zat an awm laiin  upat lam chhut theih loh pawh an awm a. 

An vai hian a ruala phum ni a hriat niin ruhro hmuh chhuahah te hian an dam laia hmanraw hmanga hliamna hnuhma hmuh tur a awm lo.

Kum 100 (+- kum 20) bawr kaltaa phum ni a chhut a ni a, an vai hian Mongoloid thlah zinga mi nia hriat an ni. 
An san zawng hi a tawi ber feet 5 leh a sang ber feet 6 leh inchi 2 inkar vel nia chhut a ni a, san zawng hriat theih loh an awm bawk. 

Hmeichhia 7 leh Mipa 2 an tel tih hriat niin hriat hran theih tawh loh khawpa ruh keh sawm an awm bawk. 

Tute nge an nih chiah tih hre thei tur chuan DNA Profiling hmanga finfiah a ngaih avangin hriat mai theih a ni lo a ni.

Ruhro hmuh dan:
Nikkum August 14 (Zirtawpni) zing dar 10 bawr vela an hmuhchhuah mihring ruhro-ah hian luruh 12 vel zet hmuhchhuah a ni a. Heng ruhrote hi Kawrthah Police Station-a lak anih hnuah vawiin khan Superintendent of Police (SP) Mamit Custody-ah lak chhoh a ni.

 Mizoram khawthlang lam Tuidam khaw ram leiminah mihring ruhro engemaw zat hmuh a ni a, Leiminna hmun hi Tuidam leh Kawrtethawveng inkar, Tuidam atanga Km 1 vela hla a ni a, Zirtawpni tlai lam thlenga ruhro an hmuh chu puitling luruh pakua leh naupang luruh pathum, ngalruh, mawlruh, taksa peng dang ruh hrang hrang te a ni. Tuiburlu pakhat a tel bawk.

Tuidam atanga thu dawn danin, Tuidam YMA Run-ah ruhro hi an dah a, Kawrthah Police te hnenah thlenin a hmunah an enho bawk.

Chawhma lam dar 10 velah khan Kawrtethawveng atanga kalte’n leimin leh ruhro hi an hmu a, Tuidam YMA hruaitute hrilhin an buaipui ta a ni.

Tuidam YMA hruaitute chuan lei hi a min nasat thu leh metre 30 bial vel a nih thu an sawi a, ruhro hi a min tawpna lama mi a an thu leh a awmna a thuk lo nia a lan thu te an sawi.

Hlumbel keh a tel thu leh ruhro hi hlumbela mi a an thu te an sawi a, ur ro hnua hlumbela dah a ni ang em tih zawhna a awm thu te an sawi bawk.

Leiminna hmun hi mimal serthlum huan a ni a, khawhmun hlui a nih loh thu leh thlanmual awmna a nih ngai loh thu te Tuidam khaw mite chuan an sawi.


Kawrtethawveng leh Tuidam inkara luruh chharna hmun hi Pu Lalchungnunga huan ram a ni a, luruh dang ala awm em tih enchiang turin Tuidam YMA-te hian uluk lehzualin hma lo la se tih niin, Lei a min belh zel loh nan YMA hmalakna hian Silpauline-in khuh nise tih a ni. He lai hmun hi District thuneitute phalna lo chuan tumah tlawh pawh lo turin mipuite ngen kan ni a. Huan neitu Pu Lalchungnunga pawh helai hmunah hian kutthlak hrih lo tura ngen nghal a ni a. Mamit DC Dr. Lalrozama, IAS,  chuan August 16 khan a hmun hi a tlawh a ni.

Post a Comment

0 Comments