Aizawl | January 6, 2021: India sawrkarin ram puma a tum khatna atana Covid-19 hri danna pekchhuah a tumnaah an ruahman sa bak tih tlem emaw telh belh emaw a rem dawn lo tih Health & Family Welfare minister Dr R Lalthangliana chuan a sawi.
Health minister hian Thawhlehni khan MJA General Headquarters executive member-te lengah sawmin Covid hrileng leh a kaihhnawih hrang hrang an sawi ho a. Covid vaccine pek hmasak turah sawrkar laipui chuan khauh takin a la thei tur chin a siam a, belh leh paih theih a ni dawn lo tiin a sawi.
Covid hrileng ang reng renga Mizoram mipui, mimal leh pawl ho heti em ema min pawtkhawm tha a la awm ngai lo tih Dr R Lalthangliana hian a sawi a. India ram hmun dang leh rampawn lam atang pawhin he hrileng kan do dana kan inlungrualna tha chu mak an tiin, zawhna a dawn tam ber a ni tih a sawi. “Sawrkar hnathawk, task force, kohhran, pawl, journalist leh mipuite min thlawpna a tha a, Pathian malsawmna dawn dawn chuan thawhchhuah ve a ngai a, kan thawkchhuak tha em em a ni,” a ti.
Sawrkar laipui lamin an chhutlawk danin 2020 December-ah Mizoramah Covid-19 kai mi 5000 chuang tura an chhut tirh lai, nikum November velah an chhutlawk dan a thlen dik thuak avangin December-a Krismas leh kumthar vuakveta mipui sahawk lai chu inkhuahkhirh zawh loh mai an hlauthawng hman hle tih a sawi a. Mahse, tanrualna avang bawkin chhutlawk aiin hri kai kan tlem ta chu lawmawm a tih thu a sawi bawk.
MJA president Pu Zonunsanga Khiangte chuan minister Dr R Lalthangliana chu minister a nih lai emaw MLA a nih loh lai pawh ni se, press mite a ngaihtuahna leh ngaihpawimawh thinnaah lawmawm a tih thu a sawi a. Mizoramah mipuiin sawrkar hmalakna kan tawiawm that thu leh state dangin an neih ve loh task force kan nei chu kan vanneihna nia an hriat thu a sawi. Hetih rual hian puipunna, mitthi vuina leh inneihna ang chia mi tel thei zat chu fimkhur tak chung si a, tihpun hret a hun tawh em tih chu ngaihtuah ngai nia an hriat thu te a sawi a ni.
National Health Mission mission director Dr Eric Zomawia chuan Covid-19 vaccine chungchanga hriat tur tulte a sawi a. Vaccine thlen hun tur la sawi theih chiah lo mah se, a hnai tawh tih erawh sawi theih a ni, a ti.
Sawrkar laipuiin hri danna dawng hmasa tura a tih sa fel taka siam niin, health department-a thawktu thlan bikte, a hmatawnga thawktu thlan bikte leh natna benvawn nei kum upa lam thlan bikte chu a pek dan tur ruahmanna siamsak vek hmangin hri danna hi pek an ni dawn tih a sawi a ni.
- The Aizawl Post
Post a Comment
He post chungchanga i ngaihdan lo sawi ve rawh: