Supply minister in SBI branch thar Kawnpui-ah hawng

Aizawl | January 30, 2021: Supply Minister Pu. K.Lalrinliana'n vawiin khan SBI Kawnpui branch hawnna hun a hmang a, Dr.H.Lalthlangliana, Deputy Commissioner, Kolasib chu Khual zahawm a ni.




Minister Pu.K.Lalrinliana chuan bank chu khawsak tihhmasawnna kawngah mi tak tak tan a malsawmna thlentu a nih thu sawiin,"SBI, Kawnpui branch chu sumdawn nan ringawt ni lovin mi te ber atanga mi lian ber thleng a hmasawnna kawng a indawrtawnna hmun nuam tak a nih ngei ka beisei a ni," a ti a, Kolasib district tihhmasawnna kawng a hmanraw pawimawh tak a nih tur thu a sawi bawk a ni. Pu.K.Lalrinliana chuan mi taimate leh ruahmanna tha nei, bul tanna tur nei si lote tan Bank chu bul tanna kawng inkawhmuhna hmun pawimawh tak a nih thu sawiin a dawrtute pawhin Bank lak a an mawhphurnate ngai pawimawh chung zel a indawrna kalpui thin a tul thu a sawi bawk a ni.
Khual zahawm Dr.H.Lalthlangliana, Deputy Commissioner Kolasib chuan Kawnpui chu insumdawntawnna hmun pawimawh tak a nih chhoh mek zel thu sawiin Bank chu sumdawnna hmunpui a nih angin dawrtu an pun chhoh zel theih nan a dawr nghaktute tawngka, chetvel dan leh mitmei an hmuh dan thlengin fimkhur a ngaih thu a sawi a, mi zawng zawng lenluh ngamna hmun a siam turin thawktute a chah bawk a ni.
Pu. L.P. Lalchangkima, Regional Manager, Aizawl chuan kalkhawmte lawmna thu sawiin Bank chu mipuite eizawnna kawnga intundin nan te leh eizawnna tihngelnghet lehzual nana hman thin tur a nih thu sawiin a thawktute chu mipui tan a rawngbawltu an nih thu a sawi a, chutiang ang takin SBI Kawnpui branch pawh tangkai tak a hmang turin kalkhawmte a chah a ni.


Rev. Zaihmingthanga, Principal, Govt. Kawnpui College, Pu. Lungtilenga, VCP, Kawnpui Venglai ten thusawina hun an hmang a, Pi.Lalnilawmi, Chief Manager, SBI chuan lawmthu sawina hun a hmang.
Grace Lalchhanhimi, Asst. Manager, Regional Branch, Aizawlin SBI branch Kawnpui hawnna hun hi kaihruaiin Pi.K.Lalremsiami, Branch Manager hovin Branch thar puala cake zaina hun hman a ni bawk.


Minister hian PHED SDO Office sakna hmun turte, Green Hills High School (adhoc aided) building thawmthat ngaite leh Public Health Centre, Kawnpui a tlawh a, damloten damdawi an mamawh ang an lam zung zung theihna tur ruahmannate, x-ray khawl thar an mamawh thute, Dental Surgeon mamawh a nih thute, Medical Officer leh staff quarter sak that ngaite leh compound hung that dan tur chungchangte sawiho a ni. 
Minister hi Pu. H.Lallianmawia, Sr.EE, PHED, Pu. Khamluaia, SDO(C) Kawnpui, Pu. Lalrambuatsaiha, DEO, Kolasib, Pu. Gaston Vanlalhriatpuia, BDO Thingdawl, Pu.Hmingthanzuala, DIPRO leh Kawnpui khawtlang hruaituten an tawiawm a ni. 

Green Hills High School hian kum 2020 HSLC exam ah khan zirlai 51 zingah 88.24% pass awmin Distinction 2 leh 1st Division 7 an tel a, tunah hian zirlai 139 an awm mek a ni.

Post a Comment

He post chungchanga i ngaihdan lo sawi ve rawh:

Previous Post Next Post