Rengdil-ah Sai sual che; Rengdil khua an mangang

Aizawl | January 9, 2021: Mizoram khawthlang lam, Mamit district-a Rengdil khaw ramah Sai sual chein huan thlai tam tak a tichhia niin thu dawn a ni.

Thu dawn danin, Sai sual hian huan thlai engemawzat leh huan thlam te a tihchhiat avangin Rengdil khaw mipuite an mangang tawh hle a. He Sai hi nikum lam atang tawh khan Rengdil khaw chhehvel ramah te a lo che tawh a. Tunhnaiah Rengdil khaw chhuahlam ramah che lehin, huan thlai tam tak leh thlam te a tichhe nasa hle a ni.

Sai chet dan chungchangah hian Rengdil khawtlang hruaitu ten Forest deptt. lam an dawr a, khawtlang hruaitute kaltlangin huan thlai leh thlam a tihchhiat te report tura tih an nih thu leh ram Sai buaipui thiam tur te rawih dan kawng zawn an tum thu an lo hrilh a ni.

Rengdil khua hi nikum khan rial tla nasa vangin an lo buai tawh a. Rial tla hian In a deng chhe nasa hle a,  sum chang thei tur thlai tam tak a deng chhe nasa hle bawk a ni.