Aizawl | January 10, 2021: Rajya Sabha MP Pu K. Vanlalvena chuan nimin khan Zokhawthar tlawhin, khawtlang mamawh leh harsatna hrang hrangte a hmunah kalin a enpui.
Zokhawthar khawtlangin an harsatna tawh hrang hrangte an sawipui a. Helicopter tumna atana khelmual hman a nih avanga a bul hnai teteah chenna In leh Zirna Sikulte a awm bawk avanga harsatna an tawh thinte chu enin, hmun dang remchang laia sawn dan turte an sawipui a. Assam Rifles Camp chu kum 10 chhung atana hawh a nih bakah, mipuite tan Inhmunah a tul avanga sawn tura hmalakna kal mek bawhzui turte bakah Middle School luah ngam loh leh tlak tawh loh pawh a hmunah a en bawk.
MP hian ramri a insumdawntawnna pisa tlawhin, Khawchhak atanga bungraw lo lut lo endikna hmun Plant Quarantine Station a tlawh bawk a. India leh Myanmar inkalpawna tur kawngpui laih mek chu a hmunah kalin a en bawk a, kawng sialtu Tarmat Company Project Manager chuan kumin March thla chhung ngeia Zokhawthar bul hnaia an la zawh loh chu zawh vek an tum thu a hrilh a ni.
Pu K. Vanlalvena hian Champhai Police Checkgate bul hnaia Assam Rifles ten tun thlenga Checkgate an lo la nei reng chu mak a tih thu leh a hriatthiam loh thu a sawi a. DIG nen an inbiakna a Ramri luia an duty bak duty an awm tawh loh thu a sawi hnu a, Champhai dai baka Zokhawthar daia Gate an lo la awmtir reng leh chu chuan zin veivakte tan harsatna an siam thin tih report a dawng reng chu a ngaimawh thu a sawi a ni.
- AIR Aizawl
Post a Comment
He post chungchanga i ngaihdan lo sawi ve rawh: