Arva-pulhri lakah Mizoram a la him - AH& Vety

Aizawl | January 10, 2021: India ram hmun thenkhata leng mek arva-pulhri, (Bird Flu) lakah Mizoram a la him niin AH and Vety department chuan an sawi.

 Avian Influenza ti a an sawi bawk, Bird Flu hi India ram State 8-ah lengin inkhuahkhirhna kalpui mek a ni a, Mizoramah erawh chuan tun thlengin he hri vei hi hmuh a la ni lova, chiaina tur a awm lo tih Animal Husbandry & Veterinary Sciences Dept hotute'n an sawi. AH & Vety Joint Director Dr.Lalhmingthanga chuan arva-pul hri lakah hian Mizoram chu a inralring reng tih sawiin, tunah hian District tinah Rapid Response Team te chu koh theih mai turin an awm reng a, invenna tur damdawi leh hmanruate pawh an dapkhawm mek tih a sawi a. Kar leh Thawhlehni hian Chief Secretary hovin District tina invenna kalpui dan tur kaihhruaina siam a nih dawn thu a sawi a. Chief Secretary hova inhmuhkhawm hnu-ah hian District Level Co-Ordination Committee te chu District tina bawrhsapte hovin an hmalak dan tur a rel leh dawn a ni. 
  Tun dinhmunah Ar lakluh khap a la nih loh thu Dr Lalhmingthanga hian a sawi bawk a, Birds Flu lakah hian Mizoram a him theih na'n theihtawp chhuah a nih tur thu a sawi bawk a ni. 
  Vety department chuan tuna India ram state thenkhata leng mek hi H5N1 leh H5N8 strain a ni a, heng hri insiam danglamte hian mihringah natna thlen thei mahse India ramah he natna hi tun thlengin mihringin an vei tih finfiahna a la awm lo a ni, an ti. Avian influenza hi mihringin ar atangin an kaichhawng thei na a, kaichhawn har tak a ni a. Mihring leh mihring inkaichhawn theih tih finfiahna a la awm lo. He natna vei hi mihring te zingah za a sawmruk in an thihpui thei ve thung a ni. He natna hi mihringin ar atangin an kai chhawng thei tih chu kum 1997 khan Hongkong a Avian Influenza len atang in finfiah a ni.

- AIR Aizawl

Post a Comment

0 Comments