MPGP-in Tuisen tlângah Paragliding flying site thar hmuhchhuak

Aizawl | January 19, 2021: Mizo Paragliding Pilots Association(MPGP) hruaitute leh Pilot-te'n Paragliding flying site atâna tha nia an lo rin tawh thin Khawzawl bul Tuisen tlang leh a chhehvel chu Paraglider a thlawh kual velna'n a tha tih finfiahin, Mizo Pilots te chuan karhmasa January 12 leh 13  khan him leh hlawhtling takin vawi li(4)test flight an nei.

Mizorama a hmasa ber ni tura Tuisen tlanga test flight huaihawtnaah khan pilot pali te leh MPGP hruaitute hian hmun dang dang atanga Khawzawl pan khawmin, test flight a hlawhtlin theihna'n theih tawp an chhuah a, he hunah hian MPGP pawl hruaitute; CVL Hruaia, Zoramthanga Ralte, Lalrochhara, Lalremruata, PC Zodinsanga, Vanlalhruaitluanga leh R Lalthlengliana te an kal a ni.

Test Flight neih lai hian Dy.Chief Minister zahawm tak Pu Tawnluia chuan Mizo Pilot te thlawk lai chu Khawzawl Helipad atanga lo thlirin, Tourism Minister zahawm tak Pu Robert Romawia Royte leh Tourism Dept. Joint Director Pu Saitlûanga pawh lirtheia kal theih chin bâk ramhnuai kawng zawn chawpah 1.5km. vel laia thui kea kalin Tuisen tlâng chhip Paragliding takeoff-na hi an han lawn thleng a ni.

MPGP chuan, "Minister zahawm takte'n Paragliding min phurpui a vang leh he flying site tihhmasawn zel dan tur ngaihtuah chunga a hmunah ngei min rawn enpui vang te, Aero Sport bik hi sorkarin min tuipui vanga tunhnaia Rules mumal tak a siam vangin MPGP chu kan Sorkar chungah kan lawm hle a ni. Tin, Khawzawl khawtlangin tha taka min lo dawngsawng kha lawmawm kan tiin, a bik takin Darngawn veng leh Zaingen veng YMA te chungah kan lawm hle.Heng bakah hian Glider leh Paragliding Equipment dang min hman tirtu Tourism Dept. chungah pawh lawmthu kan sawi mawlh mawlh bawk a ni." tiin an lawmthu an sawi.

Mizo Pilots-te thlawh chhuahna hmun Tuisen tlang hi tuipui zawl atanga tehin 5200ft. vel lâia a sang a ni a, a tlâng bulthuta awm Khawzawl leilet chu tumhmun(landing) atân hman nghal a ni. Thlawh chhuahna leh tumhmun insan hleihna hi 1450ft. vel a niin, thlawh chhuahna atanga tumhmun hlat zawng hi 1.5km vela hlâ a ni thung.

Tuisen tlâng leh a chhehvel hi mumal leh uluk zawka zir chian anih chuan Paraglider hmanga thui tak thlawh kual (cross country flight) leh Spot Landing Competition atan pawh a that ngei MPGP chuan an ring a. Sorkar hotute tuipuina zârah Flying Site changtlung tak neih zel an inbeisei.

MPGP chuan Mizo thalaite Paragliding hmelhriat tirin Pilot chher chhuah zel chu an tum pakhat a ni a, thalaite'n rilru leh taksa hrisel an neih theihna'n Paragliding hi Sport tangkai leh mahni inrintawkna neih tirtu tha tak a ni thei dawn a. Mizoram hi tlangram a nihna hmang tangkai thiama he Adventure Sport Paragliding hi kan ram mawina phochhuaktu, Tourism tihhmasawnna'na tangkai leh thalaite tan pawha eizawnna siamtu a nih ngei an beisei tlat thu MPGP chuan an tarlang bawk.