Chief Minister in Hlimen, Tlangnuam leh Kulikawn a tlawh

Aizawl | January 19, 2021: Chief Minister Pu Zoramthanga chuan tukin khan Hlimen, Tlangnuam leh Kulikawn khelmual te tlawhin, tlawmngai pawl leh khawtlang hruaitute nen hmalakna tur a enpui. Sports & Youth Services Minister Pu Robert Romawia Royte leh Aizawl South-III bialtu MLA Prof. F. Lalnunmawia ten Chief Minister hi an tawiawm a ni.

Chief Minister Pu Zoramthanga chuan Hlimen a Smart City hnuaia cheng vaibelchhe 6 hmanga khelmual sakna tur en in, Kulikawn Futsal ground leh basketball court tur an siam mek bakah Tlangnuam football field te a tlawh a ni.

Chief Minister chuan veng neituten thahnemngai taka hma an lo lak tawhna chungah lawmthu a sawi a. Hrileng karah sawrkar chuan a thaah theih chin chin te thawkin hma la mahse ruahmanna tam tak chu thawh lawk theih a nih loh thu a sawi a. Hri danna a lo awm takah chuan boruak pawhin ziaawm lam a pan zel beisei chungin, chak zawka hmasawn hna thawh chhoh zel a nih tur thu a sawi.

Sports Minister Pu Robert Romawia Royte pawhin infiamna kawnga hmasawnna ruhrel tha din belh zelin, Aizawl chhim lam tan chauh nilo state pum tana tangkai thei tur infiamna hmunhma tha siam chu sawrkarin a ngaihpawimawh thu a sawi. 

Chief Minister hi Adviser to CM Pu C. Lalramzauva leh Sports Department leh LAD hotu ten an tawiawm bawk a ni.

- DIPR