Mizoram Police lak turah Ex-servicemen leh Home Guard te tan za zelah 5 ve ve chu hauhsak a ni dawn - Home minister

Aizawl | January 14, 2021: Home Minister Pu Lalchamliana chuan Tri Services Veterans Day, a tum khatna atana Mizorama hman chu vawiin khan Mizoram Home Guards & Civil Defence hmunpui Chawlhhmun ah a hmanpui.

Kum 2017 atang khan ram pumah he Ni hi khawmual, lawng leh thlawhna sipai pension veterans te pualin 2017 atangin hman tan a ni.


Pu Lalchamliana chuan Mizoram hruai hnaa sipai bang veteran ten kawng tin rengin an lo pawimawh thin  thu te, an thlahte pawh Mizoram khawtlangah dinhmun pawimawh tak tak luahin kawng hrangin Mizoram khawtlang leh society tan an thawhhlawk hle nia a hriat thu te a sawi a. COVID hripui dona kawngah Sawrkar SOP duan angin mi tlemte sawmin social distancing te ngaipawimawhin he ni an buatsaih chuan an sipai zia - hotute thu awih a lantir niin a sawi a, fakawm a tih thu a sawi lang bawk.

Home Minister chuan ex- servicemen ten harsatna an tawh thin a hnenah an thlen chungchang sawiin hripui len avangin sum leh pai a harsa a, duh angin hma a lak theih lova, mahse sum dinhmun a that huna Mizoram Police lak turah Ex-servicemen te leh Home Guard te tan za zelah 5 ve ve chu hauhsak reserve a ni dawn tiin a sawi. Mizoramin chhiah hrang hrang leh Sawrkar Laipui atanga Mizoram chan tur sum, chhiah hrang hrangte a tlakhniam nasat dan te, 15th Finance Commission in Mizoram sum dawn tur an bithliah tlem thu te a sawilang bawk. Ex-service te inzawmkhawmna chu a tha hle nia a hmuh thu sawiin politics rawngkai in an che ngai lo nia a hriat thu te, an mahni thil bikah leh khawtlang tan an ngaihtuahna an sen thin thu te sawilangin hengte hi chhawm nung zel turin a chah tel bawk a ni.

Tri Services Day hmanna programme hi a vawikhatna atan Mizoram Ex Services League (MESL) in an buatsaih a, programme hi Hony. Capt. Ngura Sailo Vice President, MESL in kaihruaiin Col. John Zama, SM, President in inlawmna thu a sawi a. Col. Reddy, Station Commander, Aizawl Station Headquarter, Maj. Zosangliana Hualngo, SM, Commandant General, MRG & CD leh Padma Shree Hav. Lalbiakthanga Pachuau ten thu an sawi bawk a ni.
Kum 2017 atangin Tri Services Veteran Day hi hman tan a ni a, India khua leh tui, khawmual sipai hotulu hmasa ber Field Marshal K. M. Carriappa, OBE pension na ni, January ni 14, 1953 chu sipai bang pension te hriatregna ni  atan hman turah rel a ni.
MESL ah hian member 6515 vel an awm mek a, kum tin Mizo sipai 40 atangin 70 hi pension in an lo chhuak thin a, an zinga 1000 vel hi hna la thawk thei reemployed thei an ni a, Mizoram Sawrkar ah hian sipai pension mi 135 bawr vel in hna an thawk mek a ni. Mizoram CM te zingah Brig. T Sailo chu sipai officer niin AVSM chawimawina pawh a lo dawng tawh a, Pu Laldenga  pawh sipai clerk hnaa a lo thawk tawh thin a. Mizoram Chief Minister hmasa ber Pu Ch. Chhunga pawh airforce ah rei vak lo a tang a, District Council CEM hmasa ber Pu Lalsawia pawh navy ah a lo thawk tawh bawk a ni.
Indopui II ah khan Mizo sipai 3600 vel an tel a, tam takin an nunna an chan a, an zinga mi 40 bawr hi an la dam a, hmeichhia tel 30 atangin 1 ala dam a ni.  Home Minister pa Jemadar Parala pawh ex- Ist Assam Rifles leh 2nd Assam Regiment ah tangin Indopui II ah khan a tel ve a, kum 1954 a pension a ni.

- DIPR

Post a Comment

1 Comments

He post chungchanga i ngaihdan lo sawi ve rawh: