Mizoram Lokayukta in Governor P.S. Sreedharan Pillai hnenah Annual Report 2019-20 thehlut

Aizawl | January 14, 2021: Vawiin chawhnu khan Raj Bhavan-ah Pu C.Lalsawta, Chairperson, Mizoram Lokayukta chuan Mizoram Lokayukta in kum khat chhunga a hnathawh a chhinchhiahna “Annual Report 2019-20” chu Governor P.S. Sreedharan Pillai hnenah a theh lut.

Governor P.S. Sreedharan Pillai chuan Mizoram Lokayukta buatsaih Annual Report 2019 -20 chu lo dawngin a thawktute chu Corruption dona kawngah theih tawp chhuah chhunzawm turin a chah a. Mipui ten Mizoram Lokayukta tangkai taka kan hman theih nan mipui hnenah inzirtirna nasa zawka inpek kan ngai tih pawh a sawi a. Governor hnenah hian Pu C.Lalsawta, Chairperson, Mizoram Lokayukta chuan Mizoram Lokayukta buatsaih Annual Report 2019 -20 kaihhnawih bakah an hmalakna thenkhat te tawngkain a  hrilh hriat bawk a ni.

 Pu C.Lalsawta, IAS(rtd) chu  Chairman, Lokayukta atan 11th March,2019 khan lakluh a ni a. Tunah hian Mizoram Lokayukta-ah hian thawktu 27 awm mekin F.Kapsanga Building, Tuikual South, Temple Square, Aizawlah Office an nei a. Hun reiloteah Director pahnih ruat in  Inquiry Wing leh Prosecution Wing hawn tum a ni a. Record hnuhnung bera tarlan dan chuan Mizoram Lokayukta chuan Complaint Case 24 a dawng tawh a; heng zingah hian case 4 chu khar tawh a ni. Hearing vawi 2 neih a ni tawh a; hearing vawi 8 la neih thuai tur atan pawh a hun leh ni te ruat fel a ni tawh bawk a ni.

- DIPR