Lawngtlai District-a ramsain an buh leh bal a tihchhiatsakte hnenah EF&CC Department-in zangnadawmna a pe

Aizawl | January 14, 2021: Lawngtlai District chhunga ramsain an buh leh bal leh thlai a tihchhiatsak chhungkaw 25 hnenah Environment, Forests & Climate Change (EF&CC) Department chuan kumin January thla hian zangnadawmna pawisa a pe chhuak.

Kum 2020 July leh August thla chho khan Mampui ram leh a chhehvelah sai rual eng emaw zat chhuakin, Mampui rama lo neitute buh leh bal leh huan thlai chu sai rual hian a tihchhiatsak tih hriat a ni a. Sawrkar dan ding lai angin zangnadawmna pawisa dilna chu lo neitute hian theh lutin, Chhimtuipui Wildlife Division, EF&CC chuan a hmunah endikin, sawrkarah report a theh lut a. Zangnadawmna pawisa hi EF&CC Department chuan January, 2021 khan pek chhuah theihin a ruahman fel ta a ni. Sawrkar inkaihhruaina ding lai ang chuan lo neitute hian zangnadawmna pawisa dilna chu a bialtu Divisional Forest Officer (DFO) office-ah an theh lut thin tur a ni a, an dilna bawhzuiin a bialtu DFO emaw, RO emaw te'n a hmuna an endik hnuah sawrkarah report kimchang an theh lut tur a ni. 
Sawrkar notification (No.B.12011/13/99-FST dt. 7th May, 2014)-in a tihchhuah ang chuan, ramsain mihring nunna emaw, thlai emaw a tihchhiatsak chungchangah, mihring nunna hloh (thihna)-ah chuan Rs 2,00,000/- (nuai hnih) thleng pek theih a ni a. Thlai tihchhiatsak chungchangah erawh chuan thlai a tihchhiatsak ram zau zawng atanga chhutin, hectare khatah Rs 5,000/- (sang nga) thleng pek theih a ni thung. Tuna zangnadawmna pawisa pek chhuah pawh hi sawrkar dan ding laiin inkaihhruaina a siam anga endik hnua pek a ni.
Tun tuma Lawngtlai District chhunga ramsain an thlai a tihchhiatsak avanga zangnadawmna dawngtu chhungkaw 25 zinga chhungkaw 10 chu Mampui khaw mi niin, a bak chhungkaw 15 chu Kawrthindeng, Mualbu, Tuithumhnar, Diltlang S, Khawmawi, Thingkah leh Lawngtlai-lll-a chengte an ni a. Tun tuma zangnadawmna pawisa pek chhuah zawng zawng hi Rs 58,600/- a ni.

- DIPR

Post a Comment

0 Comments