Health Minister in Lengpui Airport Screening Point tihchangtlun dan tur en

Aizawl | January 20, 2021: Health & Family Welfare Minister Dr. R. Lalthangliana chuan vawiin chawhnu khan Lengpui Airport tlawhin thawhtheihna hmanga Mizorama lo lutte COVID-19 hri an kai leh kai loh finfiahna screening point' hman lai mek tihchangtlun dan tur a en.


Lengpui Airport hi Mizoram pawn atanga khualzin rawn luhna hmunpui ber pakhat a nih avangin kum kalta India rama COVID-19 kan hmelhriat tirh ata tawh khualzin rawn lut te tan screening point kan han siam a, tunhnaiah kan dinhmun a ziaawm ta nia a lan avanga kan han inthlahdul deuh takah hian khualzin rawn lut pawh an pun belh zel a rinawm a. Thlawhtheihna pawh karkhatah nitin rawn lutin vawihnih rawn tum ni pawh kar khatah nithum lai a ni ta a. Heng te avang hian khualzin rawn lut te sample test kawngah awmze nei zawka kalpui a tul a ni, a ti.

Health Minister hian Lengpui Airport-a Medical Inspection Room tlawhin screening team te nen an inkawm a, hmunhma a rem loh vanga screening team ten awm hahchawlhna tur room mumal an neih loh thu a hriatin, Lengpui Airport-a MIFCO dawr ruaka awm rih chu screening team volunteers te chawlh hahdamna hmun atana hmang turin ruahmanna an siamfel nghal a ni.

Minister hian Lengpui Airport-a lo thleng te sample lakna hmun Sample Testing Centre tlawhin an hnathawh dan te a enfiah bawk a, sample test na tur counter pahnih hman lai mek chu khualzin lo thleng an pung zel dawn nia a lan vangin counter pakhat siam belh leh tura hmalak mek a nih thu a sawi.

COVID-19 positive hmuhchhuah an awm palh pawha rang taka CCC panpuina tur Ambulance englaipawha hman theih reng tura inralrin tir a pawimawh thu sawiin, hemi atan bik liau liaua duty tur Ambulance ruahman a nih thu Minister hian sawiin, heng bakah hian ruahmanna siam ngai thil pawimawh hrang hrang te a en bawk a ni.

Minister hian COVID-19 positive te enkawlna tura ruahman Lengpui Airport bula AYUSH Hospital CCC a tlawh nghal bawk a ni.

Dr. Pachuau Lalmalsawma State Nodal Officer for COVID-19 in a tawiawm a ni.

- DIPR

Post a Comment

0 Comments