COVID-19 hri danna vawiin atangin pekchhuah tan a ni dawn; hridanna lak chu mimal duhthlanna ni mahse; mi zawng zawng an him a, an damtlan nan lak vek a pawimawh - CM

Aizawl | January 16, 2021: Rampum tuam chhuak, khawvela Covid-19 hridanna lak pui tham ber chu vawiin hian Prime Minister Narendra Modi-a’n a tlangzarh dawn. 



Chief Minister Pu Zoramthanga’n Covid-19 hridanna lak chu mimal duhthlanna ni mahse; mi zawng zawng an him a, an damtlan nan lak vek a pawimawh a ti a.

Covid-19 hridanna lak runpui hian India ram dung leh vang a tuam chhuak vek dawn a. A hawnnaah hian State leh UT zawng zawnga hridanna lakna hmun 3006 chu thlunzawm vek a ni dawn a ni. Vawiin a hawnni-ah hian hridanna pekchhuahna hmun tin atangin mi za vel theuh hridanna pek an ni ang.  
 Covid-19 hridanna hi pek hmasak mamawh zuala ngaih atanga bul tan tur a ni a, Sawrkar leh mimal damdawiina hnathawk te, ICDS hnathawk tiamin tun tumah hian pek hmasak an ni ang. 

Covid-19 hri danna (vaccine) chu India ram pumpuiah vawiin chawhma dar 10:30 hian Prime Minister Narendra Modi chuan New Delhi atangin a tlangzarh (launch) dawn a. Mizoramah pawh hemi rual hian hmun nga (5) ah pek țan ve nghal a ni ang. Pek tanna tur hmun 5 te chu -  Civil Hospital Aizawl, Zoram Medical College, Kulikawn Sub District Hospital, Urban PHC, ITI leh Civil Hospital Lungleite an ni.

Heng hmun 5 ah hian COVID-19 hri danna pekchhuah tur pual hian inkhawm buatsaih a ni ang a. ZONET Cable TV Pvt. Ltd. chuan mipuite thlir theih turin heng hmun 5 a hun hman dan hi live in a pe chhuak ang.

Prime Minister in a launch zawh ațangin Vaccine hi pek țan a ni ang a. 
Vaccine dawng hmasa tur te'n an mobile phone ah sms an dawng a, vaccine lakna hmun tur hrilh an ni bawk a ni.  Vaccine la turte'n Aadhar card leh ID Card an neih angte an ken ngei ngei a tul bawk a ni.
COVID-19 Vaccine hi a hlauhawm lova, la thei tura tihte chuan kan ram leh kan zavai mai hian COVID-19 laka kan him nan la ngei ngei turin kan in ngen a, January ni 18, 2020 ațangin district zawng zawngah vaccine pekchhuah hi kalpui a ni ang.
A thawhkhatnaah hian Healthcare worker ( damlo enkawltu) mi 8000 chuangin Vaccine hi a thlawn vekin an dawng dawn a ni. Vaccine hi vawihnih chiu (2 dosage) tur a ni a,  chiu hmasak (1st dosage) atanga ni 28 hnuah a vawihnihna hi pek an ni leh ang.

Post a Comment

0 Comments