COVID-19: Hri danna pek beihpui Jan 16-ah

Aizawl | January 10, 2021: Ram pum huapa Covid-19 hri danna damdawi pek beihpui chu Jan. Ni 16-ah kalpui tan a ni dawn. Hemi chungchanga thutlukna hi nimina Prime Minister Narendra Modi-a hova Covid-19 chungchang thlirhona leh hri danna damdawi pek beihpui thlak tan tura state leh union territory-te inpuahchah dan thlirhona neihah siam a ni a, he thutkhawmnaah hian Cabinet Secy, Principal Secy to Prime Minister, Union Health Minister leh mipawimawh dangte an tel a ni.

Puan tawh angin, Covid-19 vaccine 2 – Serum Institute of India siam Covishield leh Bharat Biotech siam, Covaxin-te chu tul bika thila hman theih turin Drugs Controller General of India (DCGI)-in a pawmpui tawh a, hri danna hi healthcare lama thawkte leh a hmatawnga thawk, mi vbch 3 vel pek hmasak an ni ang a, hemi hnu hian kum 50 chunglam leh kum 50 hnuai lam, natna benvawn chi hnih emaw a aia tam vei mek, mi vbch 27 vel pek leh an ni ang.

Hri danna pek dan tur inzirtirna, Training of Trainers hi ram pum huapin neih a lo ni tawh a, training-ah hian mi 2,360 telin an zingah hian state immunization officer-te leh cold chain officer-te, IEC hotute leh development partner-te an tel a, hei bakah hian state, district leh block level-ah programme manager 61,000 chuang, vaccine pe tu tur mi nuai 2 leh vaccination team member dang nuai 3 sing 7, training pek an ni tawh bawk.

- AIR Aizawl