Aizawl | January 30, 2021: Commerce & Industries Minister Dr. R. Lalthangliana chuan nimin khan Indo-Myanmar Border Trade Centre atana ruahman mek Bungkhawkai a tlawh a.
Minister-in Bungkhawkaia Border Trade Centre a tlawh hian a hmunah Myanmar lama Bung khua leh a chhehvel hotuten lo hmuakin an inkawm a, Dr. R. Lalthangliana chuan Thingsai atanga Bungkhawkai inkar kawng Tiau lui thlengin kawng an laih tlang tawh hian Mizoram sawrkar leh India sawrkarin Myanmar nena insumdawn tawnna an ngaih pawimawhzia a tilang chiang hle a ni, a ti a. Tunah hian kawlphetha lakluh dan tur ruahmanna siam mek a ni, a ti bawk.
He inkawmhonaah hian Bung khua leh a chhehvel khaw 13 Village Council khaikhawmtu ber Bung khaw VCP Pu Tumhmunga chuan heng khaw 13 ah hian chenna in 1310 leh mihring 8000 chuang an awm thu a sawi a, Bungkhawkai chu Indo-Myanmar border a inkalpawhna remchang leh hnaivai ber a ni tih sawiin Mizoram sawrkarin a ngai pawimawh a, Commerce & Industries Ministerin amah ngei kala a hmuna a rawn en chu lawmthu a sawi a, hei hian inunauna leh insumdawn tawnna ah phurna thar leh rah tha a chhuah ngei a beisei thu a sawi a ni.
Post a Comment
He post chungchanga i ngaihdan lo sawi ve rawh: