Aizawl | January 29, 2021: Aizawl North II bialtu MLA Dr Vanlalthlana chuan vawiin khan Aizawl Press Club-ah thuthar thehdarhtute kawmin, Congress Party in College zirtirtu leh MLA hlawh la kawp anga Mizoram Governor hnena an puhna leh MLA aṭanga ban tura an ngenna chu thudik lo a nih thu a sawi.
MLA Dr Vanlalthlana chuan, University Grant Commission (UGC) meeting vawi 359-na, Setion 3, point 3.01(2) in phalna pein, MLA emaw MP a thlan an nih hian zirtirtute hian, 'university/college aṭangin hlawh lain, allowances dang chu sawrkar aṭanga an lak theih' thu a sawi.
Dr Vanlalthlana chuan, "College aṭanga Extra Ordinary Leave (EOL) ka lak loh avangin, Speaker hriattirna nen thlap MLA hlawh ka la ta lova," tiin, MLA hlawh aia a college hlawh a tlem zawk thu sawiin, "MLA hlawh thar hi nikum kum tawp lamah khan ka college hlawh hian a pha ve chauh bawk," a ti.
"Class la ngai lo leh college pawh kalsan vang vang anga min puhna phei hi chu defamation case file-na tham a ni," a ti a. "Class lak loh chu sawi loh, nimin leh vawiin chawhma mai pawh khan kan college accounts buaipuiin ka la tei thla a ni," a ti bawk.
Ramthar North-a MLA fund hmanga hnathawh chungchang sawiin, "sawifiahna hi Ramthar north bethel welfare in thuchhuah an siam thuai tuah ka ngai," ati a. "Footpath siamna atana cheng 14,72,000 senna thawktu K Lalchhuanliana Aizawl venglai nia sawi chu a veng mipui ten an hriat loh bakah Electoral roll-ah pawh a chuang lova. A hminga hna thawh a nih bakah hian pawisa pawh lakchhuah a nih," thu Dr Vanlalthlana chuan a sawi.
MLA Dr Vanlalthlana hi MLA VL Zaithanzama'n a tawiawm a ni.
Post a Comment
He post chungchanga i ngaihdan lo sawi ve rawh: