Chief Minister hovin SEDP Board pathum ten meeting an nei

Aizawl | January 28, 2021: Chief Minister Pu Zoramthanga chuan nimin khan CM Cabinet meeting room-ah SEDP board pathum - Health and Family Welfare Board, Higher and Technical Education Board leh Commerce and Industries board te chu a chhawng in meeting a neihpui. An hmalak tawhna leh hmachhawp te bakah harsatna an tawh te a sawiho a ni.




Health and Family Welfare Board hnuaiah hian mipui hriselna atana hmalakna hrang hrang leh inenkawlna hmun tihchangtlunna an sawi zingah thingtlang inenkawlna tha zawk siam sak a pawimawh thu te sawiin, PHC tihchangtlung chu ngaihpawimawh hmasak ni se an ti a ni.

Higher and Technical Education Board thukhawm hian technical lam zirna in tihchangtlunna tur mamawh te, College hrang hrang accreditation inspection chungchang te, thawktu indaihlohna leh thu pawimawh dang te sawiho a ni.

Commerce and Industries board meeting-ah hian economy tihhmasawnna atana thing leh mau, leihnuai hausakna leh adangte hman tangkaina tura ruahmanna an lo siam tawh te sawiho a ni. Pawn lam atanga investment rawn ti duh te tan pawh kalphung awlsam zawk, remchanna lo siam pawimawh an tih thu an sawiin, thing leh mau a innghat industry siam chungchang te an sawiho a ni.

Heng board pathum a chairman Minister Dr. R. Lalthangliana, H&FW Board Vice Chairman Dr. Z.R. Thiamsanga, Hr. & Tech. Education Board Vice Chairman Dr. Vanlaltanpuia, C&I Board Vice-Chairman Pu C. Ramhluna leh member dang te an kim tlang hle a ni.

Post a Comment

0 Comments