AMC inthlan February 16-ah

Aizawl | January 23, 2021: Aizawl Municipal Corporation inthlan hun tur atan thlaleh February 16 ruat a ni a,  Inthlan hun tur hi nimin khan Mizoram State Election Commissioner Pu Laima Chozah chuan a puang a, 

Election Commissioner in a puan dan chuan Aizawl Municipal Corporation inthlan tura chuh tum te tan nimin atanga ni 28 thleng hming pek luh theih a ni anga, ni 29 ah endik tur niin February ni 1 thleng inhnukdawk duhte tan inhnuhdawh phalsak an ni ang a, inthlan chu February ni 16 zing 7:00 atanga tlai dar 4:00 thleng a ni ang. 

Vote tla te chu February ni 18 zing dar 8 atanga chhiar tan a ni anga. Inthlan that ngai a awm anih chuan February ni 17 ah neih tur niin candidate te symbol thehluh hun hnuhnung ber atan February ni 2 chu ruat ani bawk. Aizawl Municipal Corporation inthlan kaihhnawih zawng zawngte chu February 22 ral hma a zawh fel vek tur a tih a ni. 

AMC inthlanna turah hian Ward 19 awmin chung zingah paruk - Ward No 3, 8, 10, 14,16 leh 19 te chu hmeichhia tan zuah bik a ni a. He inthlanna turah hian Hmeichhia voter nuaih 1,17,195 an awm a,  Mipa voter nuaih 1,01,675 awmin a pumpuiin vote nei thei 2,18,870 an awm dawn a, Election Commission of India ta EVM  te chu hman an ni ang. 

Hetianga State Election Commission in AMC inthlan hun tur a puan tak avang hian Model Code of Conduct chu heng inthlanna in a huam tur chinah te hian kenkawh nghal a ni.

AMC inthlan ah hian Polling station awm zawng zawng hi 274 a ni a, LC/VC inthlan ah 226 awmin tunlai hrileng vangin Polling station ah mipui tlem zawk an awm theih nan polling station 48 siam belh a ni a, Polling station a Voter tamna ber 1000 ni tura ruahman a ni.

Election Commissioner chuan Mizoram Election Oberver 2 ruat tawh anih thu sawiin mipuiin Direct Complaint an thehluh theih nana ruahman ani a ti.

Election Commissioner chuan State sawrkar in SOP January 17 a siam ang zulzui a inthlan kalpui ani dawn a ni a ti bawk.