ACCJSU in assembly leh hruaitu thlanna nei; ACCJSU president atan Peniel C Rinmuanpuia thlang

• ACCJSU president atan Govt Aizawl College vice presisent Peniel C Rinmuanpuia thlang

Aizawl | January 23, 2021: Aizawl City College Joint Students'  Union (ACCJSU) chuan vawiin khan Assembly neiin, kum 2021 hruaitu tur an  thlang.

He hun hi MLA Zodintluanga chuan khuallian niin a hmanpui a, Mizoram Co-operative Apex Bank chairman T Lalmuanpuii'n khualzahawm niin a hmanpui bawk.

Khuallian Thorang bialtu MLA Zodintluanga chuan, Aizawl khawpui chhunga college zirlai hruaitu kalkhawmte chu ram leh hnam tana theihtawp chhuah turin a fuihin, kalkhawmte chu kawng engkimah dikna, rinawmna leh taihmakna nei turin a chah a. Tin, zirlai kan nih lai aṭanga tum mumal nei a, tuina tak tak nena hnathawk ṭhin turin a chah a. Ram leh hnam leh sawrkar khalh ngil tura ke pen zel turin zirlai hruaitu kalkhawmte a chah bawk a ni.

Khuallian chuan, mahni hnam ṭawng ngaihlu chunga sapṭawng zir uar turin kalkhawm te chu a chah bawk a ni.


Khualzahawm T Lalmuanpuii pawhin, "Zirlai Hruaitute chu taima tur te, mahni thawhchhuah mila an nun hman tum tur leh ruihhlo laka fihlim turin College zirlai hruaitu kalkhawm te a chah a. Apex Bank in kut hnathawktu te harsatna hria a, sawhthing lei kawnga hma an lak mekna te a tarlang bawk.


Chawhnu lamah 2021 hruaitu tur thlangin president atan Peniel C Rinmuanpuia Govt Aizawl college (GAC), vice president-ah Lalrengpuia Pachhunga University College (PUC), general secretary-ah F Lalramnunsanga Govt Aizawl West College, assistant general secretary-ah Vanlalhruaia Govt J Thankima College, treasurer-ah Lalthanzuali Women's Polytechnic Aizawl leh finance secretary atan Johny Vanlalmuana Govt Zirtiri Residential Science College  te an thlang a ni.


ACCJSU assembly hi an vice president C Lalhmingsanga'n kaihruaiin, ACCJSU treasurer KC Lalremruati'n hunserh a hmang a. ACCJSU general secretary V Lalfakmawia hnen aṭangin report ngaihthlak a ni bawk. 





He hun hi MZP General Hqrs president B Vanlaltana leh MSU general headquarters J Lalmuanzuala te'n hmanpuiin, fuihna thu an sawi bawk a ni.



Aizawl City College Joint Students' Union (ACCJSU) hi kum 2000 November thlaa din niin, a hnuaiah hian Aizawl khaw chhunga Affiliated College sawm an awm mek a ni.

Post a Comment

0 Comments