Aizawl | December 21, 2020: Transport Minister Pu T.J Lalnuntluanga'n vawiin khan a piasa-ah district headquarters paruk- Siaha, Champhai, Kolasib, Serchhip, Lawngtlai leh Mamit a Pollution Testing Centre a hawng.
Minister chuan khawvel hmasawnna in a ken tel pakhat chu pollution hi a ni a, Mizoram pawhin he hmasawnna tem ve in, chetlak a awlsam nan lirthei a lo pung zel a ni, a ti a. Lirthei neituten vehicle registration leh insurance tih dawna harsatna an tawhloh nan, pollution free certificate pekchhuahna leh boruak chhe siam thei lirthei uluk taka vil a nih theih nan, The Motor Vehicle (Amendment) Act, 2019 in a phut angin District Transport Officer enkawlna hnuaiah Pollution Testing Centre paruk te chu tangkai taka hman a nih theihnan a hawn thu a sawi.
Pollution Testing Centres hi Transport Department leh Mizoram Pollution Control Board (MPCB) te nen tangkawpa din a ni a, MPCB ten thawktute hnenah technical training te an pek thu Minister hian a sawi bawk.
District thar Khawzawl, Saitual leh Hnahthial ah DTO an awm loh avangin Pollution Testing Centre neih a la nih theihloh thu leh nei tura hmalak a nih tur te a sawi bawk a ni.
Pollution Testing Centre paruk hawnna ah hian Transport Department leh MPCB hotu tlemte an tel a ni.
Post a Comment
He post chungchanga i ngaihdan lo sawi ve rawh: