School Education Minister-in Hnahthial DEO leh DPO Office a hawng

Aizawl | December 5, 2020: Hnahthial District tih puitlinna kal zelah vawiin khan District Education Office leh District Project Office, Samgra Shiksha, Hnahthial District chu School Education Minister Pu Lalchhandama Ralte chuan Khuallian niin a hawng a, Transport Minister Pu TJ Lalnuntluanga chuan Khualzahawm niin a hmanpui bawk.


DEO leh DPO hawnna inkhawm hi Govt High School Hnahthial kawtzawlah neih niin Pu Lalchhandama Ralte Minister chuan hripui vangin sum leh pai a harsat thu leh duh angin hmalakna a chak theih loh thu sawiin "chutiang karah District ban pawimawh tak DEO leh DPO Hnahthial-ah hawn a ni thei ta leh hawng theia ka awm hi a lawmawmin Pathian hnenah pawh lawmthu ka sawi a ni" tiin ram hmasawnna atan hian Human Resource Development chu a bulpui ber a nih thu leh chumi kawnga sulsutu Education Department-a thawktute chu tha taka tawiawm turin mipuite a chah a ni. Zirtirtu te file chu Mihring an nih thu sawiin Education Minister chuan "Zirtiru hna hi hlawh hmuh nan chauh ni lo, Missionary rilru puin thawk ila, District Education Office kan hawn thar hian kan Zirna quality tha thlen se" tiin Zirtirtu tha leh fel tak tak an awm laiin entawn tlak loh engemawzat an awm niin a hriat thu a sawi bawk a ni.  Chief Minister Pu Zoramthanga chu Zirna ngaipawimawh mi a nih avangin  Kum 2 vel chhungin Education Deptt hnuaiah hnathar 1800 vel lak a nih tawh thu sawiin Minister chuan "tih tur erawh tam tak ala awm a, kan ti zel ang a, tun dinhmuna thawktu awm ang angte hian thahnem ngai takin i thawk ang u" tiin Education Department ram leh building awm ang ang te chu mahni ta anga enkawl theuh turin mipuite a chah a, "Kan ram leh hnam tana hmun pawimawhah min ngaihsak rawh u" tiin kalkhawmte a ngen a ni.


He huna Khualzahawm Minister Pu TJ Lalnuntluanga chuan "thiamna avanga tling ni lova tute emaw puihna avanga tling tura inhriatna hi a tha lovin nuaibo a ngai a ni" tiin degree neih ringawt hi a tawk lova, tling thei tura thiamna tak tak neih a ngaih thu leh Moral development chu Zirna In atanga bul tan a ngaih thu a sawi a ni. Mahni tih tur tha taka tih chu zahawmna a nih thu Minister Pu TJ.Lalnuntluanga chuan sawiin "kan hnathawh san leh san loh hi zahawmna a ni kher lo" tiin Zirlaite hnenah ngaihtuahna dik hrilhhriat thin pawimawh a tih thu a sawi bawk a ni.

He hunah hian Hnahthial District Bawrhsap Pu Vanlalmawia chuan kalkhawmte lawmna thu a sawi a, Pu Lahmachhuan Jt.Director, Education & State Project Director, Samagra Shiksha chuan thu a sawi bakah Hnahthial khawtlang aiawh Pawl hruaitu ten Hnahthial District tih changtlun a nih zel avangin Sorkar chungah lawmthu an sawi bawk a ni.

DEO leh DPO Hnahthial hawnna neih zawh hnu hian Transport Minister Pu TJ.Lalnuntluanga leh Education Minister Pu Lalchhandama te hian Hnahthial chhimlam kawtchhuaha District Transport Office dahna tura ruahman ram pawh en nghalin tih tur tul angte chak taka bawhzui a nih tur thu Transport Minister Pu TJ-a chuan a sawi a ni.

- DIPR

Post a Comment

0 Comments