LADC MDC Inthlanpui 2020 tluang takin zo

Lawngtlai | December 5, 2020: Lai Autonomous District Council (LADC) hnuaia Member of District Council (MDC) seat 25 atana Inthlanpui buatsaihah bial (constituency) 25-a polling station 111-ah te nimin khan tluang takin vote thlak a ni.




Vote thlak hi zing dar 7-ah tan a ni a. Vote thlak hma hian khawl that leh that loh enchhin nan mock poll neih niin, tluang takin vote thlak chhunzawm a ni a. Tlai dar 4 thleng vote thlak hun hawn niin, hemi hun chhunga vote thlak zawh hman lohna polling station thenkhatah chuan hun hi pawhsei a ni.

Inthlan ni hian LADC hnuaia MDC constituency 25-a polling station 111-ah vote thlak nana hman Electoral Voting Machine (EVM)-ah vote awm thei zawng zawng 51,456 (mipa 25,352 leh hmeichhia 26,104) atangin vote 43,060 (mipa 21,339 leh hmeichhia 21,721) a tla a, chu chu 83.68% a ni.
Inthlan nia mahni vote neihna hmuna vote thlak thei lo tur (election duty tur leh COVID-19 vanga home quarantine mek)-te tan postal ballot 851 pek chhuah niin, vawiin thleng khan postal ballot vote 802 (mipa 623 leh hmeichhia 179; election duty 516 leh home quarantine 286) a tla tawh a, 49 chu la nghah mek niin, vote chhiar hun thlengin postal ballot hi dawn theih a la ni. EVM vote tla leh tun thlenga postal ballot vote tla zat belh khawm chu 43,862 (mipa 21,962 leh hmeichhia 21,900) a ni a, chu chu vote awm thei zat (51,456) atangin 85.24% a ni.
Constituency 25 awm zingah, vote 3,477 (M-1,771; H-1,706) awmna 20-Sakeilui MDC Constituency-ah vote 3,262 (M-1,677; H-1,585) (93.82%) tlain, vote tlak thatna ber constituency a ni a. Vote 2,169 (M-1,032; H-1,137) awmna 15-Lawngtlai-III MDC Constituency-ah vote 1,572 (M-740; H-832) (72.48%) tlain, vote tlak chhiatna ber constituency a ni thung.
Polling Station 111 awm zingah, 25/6-Chamdur P-II Polling Station-a vote awm zawng zawng 122 (M-65; H-57) atangin vote 120 (M-65; H-55) (98.36%) a tla a, vote tlak thatna ber polling station a ni a. 17/1-Paithar Polling Station-a vote awm zawng zawng 527 (M-251; H-276) atangin vote 345 (M-154; H-191) (65.46%) a tla a, vote tlak chhiatna ber polling station a ni thung a. Hei hi COVID-19 avanga home quarantine lai an tam vang a ni a, home quarantine laite atang hian postal ballot 111 a tla a ni.
Nimina EVM vote thlak hun khar a nih hnuah polling station tina polling party-te chuan Lawngtlai an pan khawm nghal a. Strong room awmna Lawngtlai DC office complex-ah lo dawnsawn zel niin, vote thlakna EVM leh polling material dangte chu felfai taka chhinchhiahin strong room-ah dah luh nghal zel a ni a. Polling party-te hian harsatna awm lovin tukin zingkar khan Lawngtlai an thleng kim thei vek a ni.
Ruahman lawk dan chuan, LADC MDC Inthlanpui 2020-a vote tlate hi December ni 8, 2020 (Thawhlehni) khian Lawngtlai DC Complex-a DC Hall No. 2 leh BDO BNRGSK Hall-ah te zing dar 10:00 atangin chhiar a ni ang.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post