Nakkum January 15 atangin sikul hawn tum

Aizawl | December 16, 2020: School Education Minister Pu Lalchhandama Ralte chuan nakkum January ni 15 atangin School hawn tum anih thu a sawi a, zirlaiten an zirlai Course an zawh hun tur chu a pangngaiah nakum March thla ni mahse April thla thleng Academic Session kalpui a ni ang a ti.


Pu Lalchhandama  hian nimin khan Khawzawl District Education Office leh District Project Office, Samakra Shiksha te a hawng a. Hetah hian thu sawiin COVID-19 vangin kuminah hian School Education Department in harsatna an tawk nasa hle a ti a. April atanga Class tan tur anih laiin Elementary phei chu ni khat pawh an kal thei lova. High School leh Higher Secondary School te pawhin Online Class an kal a ngaih phah tih a sawi a. Minister chuan naupang ten an kum mil a an zir tur an thiam an duh thu leh kum hloh lova pawl an sawn an duhsak tih sawiin nakum January ni 15 atanga Class tan turin ruahmanna an siama, Lesson Plan mumal tak nen zirlaiten an zirlai Course an zir theihna turin nakum April thla thlengAcademic Session kalpui anih tur thu a sawi a. Hei bakah hian Pawl 10 leh Pawl 12 zirlaite tan Board Exam pawh buatsaih a ni dawn tih sawiin nakum March thla chawhnu lamah leh April thla chawhma lamah te Board Exam hi buatsaih a ni dawn tih a sawi.


Minister chuan sum harsatna leh hripui leng karah pawh Sawrkar chuan School Education Department chu a ngai pawimawh tih sawiin a tul angin Officer aṭanga Grade 4 thlengin hna lak a ni a ti a, zirtirtu leh a kaihhnawih Battalion 2 daih an la tawh tih sawiin tunah hian Gazetted Officer, High School Headmaster 76 lakna tur leh Middle School Headmaster 50 chuang lakna tur phalsak an ni tawh tih a sawi. 

- DIPR/AIR

Post a Comment

0 Comments