Aizawl | December 14, 2020: Vawiin chawhma dar 11:00 khan Lai Autonomous District Council (LADC) hun 11-naa Pro tem Chairman atana ruat, 23-Sekulh MDC bial atanga thlan tlin Pu Lallawmsanga Apetow chu Lawngtlai Bawrhsap Dr Andrew H. Vanlaldika chuan LADC Secretariat tualah rinawmna thu tiamtirin a la lut a. Pro tem Chairman hian 11th LADC-a member tharte chu rinawmna thu tiamtira la lut ve lehin, hemi hnu hian Bawrhsap chuan 13-Lawngtlai Council Veng MDC bial atanga thlan tlin, Pu Manghmunga Chinzah chu Chief Executive Member (CEM) atana rinawmna thu tiam tirin a la lut nghal bawk.
Hun hawnna atan Lairam Isua Krista Baptist Kohhran (LIKBK) Assembly Choir te'n Lai tawngin "Halleluiah Chorus" remin, LIKBK-a AGS Rev. Dr Lalpekhlua Chinzah chuan hunserh a hmang a. Pro tem Chairman leh MDC-te lak luhna chu LADC-a Secretary Pu Lianchungnunga chuan a kaihruai a. Pro tem Chairman atana Pu Lallawmsanga Apetow ruatna sawrkar notification No. H. 14011/4/2007-DC&MA(L) Dt. 11th December, 2020 chu chhiar chhuakin, LADC (Constitution, Conduct of Business, etc.) Rules, 2010 rule 30 sub-rule (4)-na tlawh chhana Pro tem Chairman hi ruat a nih thu a sawi a. Bawrhsapin Pro tem Chairman a lak luh hnuah, Pro tem Chairman chuan LADC-a MDC bial 25 awma MDC thlan tharte chu a bial indawtin a la lut zui nghal a ni.
Chief Executive Member (CEM) thar lak luhna hi LADC-a Executive Secretary Pu H. Lalramenga chuan a kaihruai ve thung a. CEM atana Pu Manghmunga Chinzah ruatna sawrkar notification No. A. 43016/1/2010-DC&MA(L) Dt. 11th December, 2020 chu chhiar chhuakin, LADC (Constitution, Conduct of Business, etc.) Rules, 2010 rule 21 sub-rule (4)-na tlawh chhana CEM hi ruat a nih thu a tar lang a. Hemi hnu hian Lawngtlai Bawrhsap chuan 11th LADC-a MNF Legislature Party Leader Pu Manghmunga Chinzah chu CEM atan la lutin, Lawngtlai East bialtu MLA & Agriculture Development Board Vice Chairman Pu H. Biakzaua leh CEM thar Pu Manghmunga Chinzah te'n thu an sawi bawk.
- DIPR
Post a Comment
He post chungchanga i ngaihdan lo sawi ve rawh: