Consumer Affairs minister-in Consumer Chhantu leh Ram Ropui II tlangzarh

Aizawl | December 14, 2020: Vawiin khan Food, Civil Supplies and Consumer Affairs Minister Pu K.Lalrinliana’n Mizoram Consumers’ Union buatsaih Consumer Chhantu (monthly magazine) leh Prof. Chawngsailova ziah Ram Ropui II a office-ah a tlangzarh.

Minister Pu K.Lalrinliana chuan mipuiten dikna chanvo an chan theih nana Mizoram Consumers’ Union ten thlatin chhuak tur ‘Consumer Chhantu’ an buatsaih chu lawmawm a tih thu sawi a. I.T leh Social Media chak tak karah engkim kan inhre pawh zung zung a, amaherawhchu Consumer chungchanga Act, Rules leh sawrkar thuchhuah leh consumer case hrang hrangah te print media hman tangkai hi a hlu a,  hman tangkai zel a tul a ni, a ti bawk. Consumer Chhantu Magazine ah hian consumer ngawng thei Consumer News, Court Thuremna bakah Articles- Cable TV Operator dan bawhchhiat theihte, Farm Law, 2020 te a tel thu sawiin, hengte hi mipui chanvo humhim sakna kawngah hma ti sawntu a nih a rin thu a sawi a ni.

Programme hunserh hi Rev. Vanlalzuata’n a hmang a, Consumer Chhantu editor leh Mizoran Consumers' Union Vice President ni bawk Pu Thanglura chuan hunrei tak rokhawlhna avangin Consumer Chhantu tihchhuah a niloh thu leh tun hnaiah sawrkar hmalak zara tihchhuah a ni leh chu lawmawm a tih thu a sawi a. Ram Ropui II ziaktu Prof. Chawngsailova pawhin a lehkhabu ziah panga na Minister Pu K.Lalrinliana’n a tlangzarh avangin lawmawm a ti a, a lehkhabu ziah chuan ram ropui zawkte kalphung leh nundan tha a hmuhte atanga ziak anih thu leh thangthar ten chona an hmuh theih a beisei thu a sawi a ni.

He hunah hian Food, Civil Supplies and Consumer Affairs Secretary Pu Vanlalngaihsaka, Food, Civil Supplies and Consumer Affairs Department Director Dr. Lalhriatzuali Ralte, IAS leh midangte an tel a ni.

Consumer Chhantu hi Consumer Awareness leh consumer te tana hriattur tangkai tak tak, The Consumer Protection Act, sawrkar in thil man a tihchhuah te- Consumer nghawngthei chi hrang hrang LPG Rate, Fair Price Shop, Electric Bill, Telecom Services, Public Transport fare, Water Tariff, Cable TV rate, school fee, Insurance claim leh a dangte a theih anga tarlan thin a ni ang. Consumer Chhantu hi kum 1999-ah khan chhuah tan niin, July ni 27, 1999-ah RNI registration hmuh a ni.

- DIPR