Deputy Chief Minister Pu Tawnluia'n MINECO Multipurpose Hall a hawng

Aizawl | December 15, 2020: Vawiin khan Deputy Chief Minister Pu Tawnluia'n Urban Development and Poverty Alleviation Department Office MINECO bulah Department hmalaknaa sak Multipurpose Hall a hawng a. MYC Chairman Dr. Vanlaltanpuia'n Deputy Chief Minister hi a tawiawm a ni.


Deputy Chief Minister Pu Tawnluia,UD & PA changtu Minister ni bawk chuan UD & PA Department in khawpui hmasawnna leh changkanna tur a buaipui leh a ngaihpawimawh rualin khawpuia cheng mi rethei leh mi harsa te chawikana, kawng hrang hranga hma an sawn theih nan an tana hnathawh leh hma lak chu Department hna bulpui a ni telin, hei hi chak taka kalpui mek a ni tiin a sawi a. PMAY (Housing for All), NULM leh BSUP te hmangin  chak takin hemi kawngah hma lak mek anih thu a sawi.
 
Pu Tawnluia chuan National Urban Livelihoods Mission (NULM) atangin Mizoram pumah Self Help Group 1440 din a nih tawh thu sawiin he project kaltlangin khawpuia cheng mirethei chhungkaw nu te anmahni inpui tawm tur a thawhhona tha siam sak an nih thu te, thil them thiam zirtirna – Skill training pek an nih thu te leh loan pung  subsidy pek theih Interest Subsidy Loan te hmangin mi tam tak puih an nih thu te a tarlang a. Mizoram khawpui 15 a Home leh Child Care Institute hrang hrang 92 hnenah tanpuina pek mek anih thu te leh State Cancer Hospital, Zembawk leh State Referral Hospital, Falkawn ah te damlo mi harsa zual te tan tangkai thei khualbuk an enkawl mek te pawh a tarlang bawk a ni.
 
Deputy Chief Minister chuan Covid hripui in khawpui a cheng mi harsa te, nitin inhlawh te a nghawng zual tih sawiin anmahni tanpui a an dinhmun tih ziaawm nan Department-in tan a lak thu a sawi a. Aizawl a BSUP a cheng leh khawpui dang 22 a chhungkaw 3186 lai hnenah inkharkhip lai April thlaa tanpuina sum fai bakah nitin mamawh leh damdawi te  Department in an pek thu a tarlang a. Chutiang bawkin DAY-NULM hmangin April thla vek khan khawpui 23 a chhungkaw 2600 hnenah Support to Urban Poor, hri leng vanga harsatna tawk tanpuina programme kalpuiin cheng nuai 26 semchhuah anih thu pawh a tarlang a ni.  Hripui lengin kawtthler a thilzuar Hawker leh Street Vendor  te eizawnna kawngah harsatna a siam sak thu sawiin PMSVAN Nidhi Scheme kalpui  a nih thu sawiin, loan rulh hautak lo chi, an sumdawnna pui tura an lak theih nan hma la in hetiang loan hi mi 632 hnenah pek chhuah a ni tawh a ni, a ti.
 
Pu Tawnluia chuan MINECO a cheng te’n a an hman tangkai theih tur Hall changtlung tak hawn chu tangkai taka an hman a beisei tiin MINECO changtlunna tur project hrang hrang kalpui mek a tarlang a. MINECO hmun chu Chief Minister Pu Zoramthanga’n hun hmasa lama khatih hunlaia Prime Minister leh Home Minister ten thahnemngai taka a nawrna rah anih thu sawiin a tih changtlun hna leh kawng hrang hranga tihphuisui chu tuna Sawrkar mek te mawh a ni, a ti a. Hemi kawnga hmalakna hrang hrang te a sawilang bawk a ni.  
 
Thusawitu dang Commissioner & Secretary, UD & PA Department chuan MINECO a sawrkar quarters a cheng ten kum engemaw zat kalta atang khan Hall neih an buapui dante sawiin tunah Hall changtlung tak hawn a ni ta chu lawmawm a tih thu a sawi.
 
Hall hawnna inkhawm hi Pu H. Lianzela, Director, UD & PA Department in kaihruaiin Hall sak chungchanga Technical Report chu Pu J. Laldingliana, AE, UD & PA Department in a sawi.
 
Multipurpose Hall chu MINECO-a chhungkaw 233 cheng mek ten kawng hrang hranga an tangkaipui theih tur thu MINECO Welfare Committee Vice Chairman Pu David Lalthankhuma'n a sawi bawk a. Lawmthu sawiin Pi Irene Zohlimpuii, Joint Secretary, UD & PA Department in hun a khar a ni.
 
Multipurpose Hall hi Mizoram Sawrkar sum ruahman atanga sak niin cheng nuai 350 seng a sak a ni a, Risors Associate Services, Zarkawt ten an sa a ni. October 2018 khan sak tan niin, August 2020 khan sak zawh a ni a. He Hall hi chhawng thum niin chhawng khatna ah Badminton Hall, changing room 2, inthiarna wash room 4 leh Store room 1 awmin a carpet area zau zawng hi 275.43 square metre a ni a. Basement I ah Committee Room, Table Tennis Hall, Gym Room leh inthiarna 3 awmin a carpet area zau zawng chu 202.56 square metre a ni a. Basement II ah hian Laboratory Room leh Record Room leh room dangte awmin a carpet area zau zawng chu 163.72 square metre a ni. Lirthei ke pali nei 3 leh lirthei ke pahnih nei 6 dahna tur parking hmun pawh a awm bawk a ni.


- DIPR

Post a Comment

He post chungchanga i ngaihdan lo sawi ve rawh:

Previous Post Next Post