Chief Minister in Reiek ah PHC building sakna tur leh Reiek Water Supply Scheme tan lungphum a phum

Aizawl | December 15, 2020: Chief Minister Pu Zoramthanga chuan vawiin chawhnu khan Reiek a Public Health Centre building that sakna tur leh Reiek chawmna tur Water Supply Scheme (feeding leh pumping) siamna tur lungphum a phum.

Heng hmalakna thar puala inkhawm tawi buatsaihah khuallian Chief Minister chuan mipui hriselna a ngaihpawimawh thu leh, damdawi in te a rem dan ang zela tihchangtlun tum a nih angin vawiinah Reiek PHC thar sakna tur lungphum phum a nih tak thu a sawi a. Reiek khaw tan tui thianghlim lakna tur thar a awm dawn ta chu a lawmpui thu a sawi bawk. Chief Minister chuan Zoram hmasawn theihna Pathianin a dah tam tak hmuthiam a, remhriatna nei a, haichhuak thiam apiangin malsawmna an chan tur thu a sawi a. Ram hmasawnna atan Zoram mipuite theihtawp chhuahpuiah a sawm a ni.

He huna khualzahawm Sports Minister Pu Robert Romawia Royte chuan PHC leh tuilakna thar an nei tur chu a lawmpui thu a sawi a. Reiek leh a chhehvel chu Tourism department in hmalakna lian tak a neihna hmun, khualzinte pawh hip nasa tak a nih avangin Reiek tihhmasawn pawimawh thu leh, vawiina hmalakna thar lungphum phum tak te nen Tourism hmasawnna a kalkawp zel thu a sawi a ni.

Special Guest Dy. Govt. Chief Whip Pu Lalrintluanga Sailo leh Chief Secretary Pu Lalnunmawia Chuaungo te pawhin thu sawiin, Reiek khaw mipui tana tangkai tak tur, tui harsatna sutkianna leh PHC building hlui tawh tak siamthatna bultan a nih avanga an lawm thu an sawi a ni.

H&FW Department Secretary Pu H. Lalengmawia chuan he inkhawm hi kaihruaiin, Directorate of Health Services Sr. EE Pu C. Lalkima leh AWT Sr. EE Pu Lalrinzuala Ralte ten technical report an pe a. Reiek VCP hnen atanga thusawi ngaihthlak ni bawkin, H&FW Principal Director Dr. F. Lianhlira chuan lawmthu sawiin hun a khar a ni. He hunah hian Sports, Youth Affairs & Tourism Development Board Vice-chairman Pu TC Pachhunga pawh a tel a ni.

Reiek PHC sak tur hi project cost chu Rs. 2,89,53,700 niin, feet 7,242.6 bial a zau, chhawng hnih a sak tur a ni. Ground Floor-ah heng - Casualty, OPD, OT, MO Office, Pharmacy, Laboratory, X-ray, Store Room leh Toilet Block te awm tura ruahman niin, First Floor chu Female Ward, Male Ward, Labour Room, Induction Room leh toilet block atan ruahman a ni bawk. A sak hna thawk tur contractor atan Zamzo Engineering, Construction & Consultancy chu thlan niin, work order issue ni atanga thla 18 chhunga sa zo tura beisei a nih thu report ah tarlan a ni.
Reiek Feeding & Pumping Water Supply Scheme (Gravity Flow & Pumping System of Water Supply Scheme) hi NABARD hnuaia  Rs. 12,96,63,000 hmanna tur, mi 3519 charm tur niin, Dihmunzawl atangin tui la in, Ailawngah Pump House dah a, tuizem lian (reservoir) chu Reiek Tlang a dah tur a ni a. Tun dinhmunah tui supply hi furah 40 Lpcd niin, thalah 34 Lpcd a ni a. He water supply scheme thar hi hman a nih hunah chuan 55 Lpcd in tui supply a ni tawh dawn a ni.

- DIPR

Post a Comment

0 Comments