COVID-19: WHO in hri intanna Wuhan Khawpui endik thei dawn ta!

Aizawl | December 21, 2020: COVID-19 hri rawn darh chhuah tanna nia ngaih China ram Wuhan khawpui endik turin researcher mi 10 hmanga din pawl pakhat thla leh khian Wuhan-ah an kal dawn tih World Health Organization (WHO) chuan a sawi.



Zalen taka endik phalna pek hi Chian hian a hreh hle a, thla tam tak chhung inbiak remna an neih hnuah tunah hian endik phalna an hmu ta chauh a ni.
Covid-19 hri hi Wuhan khawpuia sa hring zawrhna dawr pakhat atangin a rawn darh tan nia ngaih a ni a. Covid-19 lo chhuahna bul chhui tur thuah hian U.S leh China inkarah inhmun thiam lohna a thleng hial a. Donal Trump-a chuan China hian Covid lo chhuahna hi khuh bo a tum, tiin a puh a ni.
WHO-in Endik A Duh Chhan:
Hetia kan endik hian WHo chuan mi dik lohna va zawn chhuah lam hi kan tum a ni lo a. Hri rawn darh leh tur kan ven thiam theih nan a ni zawk tiin Wuhan-a kal tur pawl member biology lam mi thiam pakhat chuan a sawi.
"Eng thil nge thleng? tih kan hriat thiam nan leh kan hmu chhuak a nih pawn nakin hnua a thlen nawn tawh loh nan, tuna thil thleng atanga inzir a nakina kan inven thiam nan a ni" tiin Fabian Leendertz, Germany-a Robert Koch Institute-a thawk  chuan AP news a hrilh a. "Virus hi engtik hunah, eng tiang step neiin nge a darh zau theih? tih hre turin Wuhan atanga lo darh chhuak a ni em tih hi kan zir chiang dawn a ni" a ti.
Endik hun chhung hian chawlhkar 4 emaw 5 a awh mai thei, a ti bawk.
China hian virus sample a kawlte en a phalsak vek ang a, Wuhan-a sa zawrhna hmun pawh endik a phalsak dawn nia hriat a ni.

- Tahan Post/ NEWS Agency

Post a Comment

He post chungchanga i ngaihdan lo sawi ve rawh:

Previous Post Next Post