Chief of Justice of India-in Mizoram a tlawh

Aizawl | December 22, 2020: Chief Justice of India, Justice Sharad Arvind Bobde, India rama court sang ber Supreme Court Chief Justice chuan ni hnih cham turin  nimin khan Mizoram a rawn tlawh.


A pual hian Assembly Annexe Conference Hall, Aizawlah “Meet on Green Mizoram” tih thupui hmangin programme buatsaih a ni. Kum 30 hnua Chief Justice of India-in Mizoram a rawn tlawh lehna hmasa ber a ni.

Chief Justice of India Justice Sharad Arvind Bobde chuan Mizoram mipuiten environment an humhalh thatzia te, ram pumah forest area nei tha ber te zinga mi a ni thei te leh kum tina Green Mizoram Day puala thing phun leh a enkawl zui hna an thawk thin chu chhuanawm a tih thu a sawi a. Thing leh mau, lui leh nungcha humhalh chu Mizo te nunphung leh ziarangah a bet tlat nia a hmuh thu a sawi. Environment humhalh ngai pawimawh em em tu Supreme Court Chief Justice chuan Environment humhalh beihpui hi mihring damkhawchhuahna nena inzawm tlat, sakhuana - religion a ni, a ti a. Sakhua hian mihringte a phuar khawm ang bawkin environment humhalh beihpui hian khawvel hmun tina mite a phuarkhawm a ni, a ti.

Mihring nunna atan a pawimawh em avangin dan hmanga roreltu judiciary chuan a theih chin chinah environment humhalh hi an kengkawh tur a ni, Chief Justice chuan a ti a. Environment chuan khawvela mihring chhuan lo awm tawh, awm mek leh awm zel turte a nghawng dan a intluktlang vek a ni, a ti. Environment hnathawh dan leh a humhalh dan hrethiam tur chuan tunlai thiamna field hrang hrang - biology, ecology, earth science, geography, atmospheric science, mathematics leh a dangte a kaihhnawih vek avangin heng zirna peng hrang hrang te hi a khaikhawm, a ti a. CJI chuan hetiang lam hawi program buatsaih hi environment chhe zel tur venna leh humhalhna kawnga hmalakna pawimawh tak nia a hriat thu sawiin Mizoram Sawrkar hmalakna fakawm a tih thu a sawi bawk a ni.
Chief Minister Pu Zoramthanga chuan Mizoramin sik leh sa, thing leh mau, lui leh nungcha te humhalhna turin kum engemaw zat kalta atang tawh khan Green Mizoram Day kum tin hman thin a ni, a ti a. Environment humhalh a pawimawh tluk zetin mipuite ei leh bar, sum leh pai thawhchhuah dan tur ngaih pawimawh a tul vangin environment humhalh leh economy siam that hi a kal kawp tlat tur a ni, a ti. Chief Minister chuan mau chungchang sawi langin thla reilote chhunga puitling thei, boruak tih thianghlimna atana tangkai, suma chantir theih ni bawk si a nih avangin Mizoram sawrkarin hemi kawngah hian chak takin hma a lak mek tih a sawi bawk.
Gauhati High Court Judge pahnih Justice Michael Zothankhuma leh Justice Nelson Sailo bakah Principal Chief Conservator of Forests Pu Jitendra Kumar leh Central YMA President Pu Vanlalruata ten thu an sawi a. Law Minister Pu TJ Lalnuntluanga’n lawmthu sawiin hun hnung a khar a ni.

He hunah hian Mizoram Legislative Assembly Speaker Pu Lalrinliana Sailo, Deputy Speaker Er.Lalrinawma, Planning Board Vice Chairman Pu H.Rammawi leh sawrkar hotulu dangte programme-ah hian an tel a. Gauhati High Cout Chief Justice lo ni tawh Pu Ajit Singh chuan Chief Justice of India hi a rawn tawiawm a ni.

- DIPR

Post a Comment

0 Comments