Art & Culture Minister-in Mizo Academy of Letters kum tawp inkhawm a hmanpui

Aizawl | December 12, 2020: Art & Culture Minister Pu R.Lalzirliana chuan Central YMA Hall, Aizawlah Mizo Academy of Letters (MAL) kum tawp inkhawm nimin khan a hmanpui a. Book of the Year 2019 atana thlanchhuah Falung ziaktu Pu Lalengzauva hnenah thuziak leh pawisafai a hlan a ni.

Pu R.Lalzirliana chuan MAL te hmalakna fakin Mizo hnam tana rohlu an ni, a ti a. Lehkhabu tha tak tak tam tak zinga Book of the Year atana thlan chhuah Falung chu lehkhabu ngaihnawm leh zirtirna nei tha, kan ramin a mamawh em em dikna leh huaisen inzirtirna, nu leh pa te thuawih pawimawhzia tarlangtu a ni, a ti.

Khuallian, Art & Culture Minister hian MAL Vice President Pu C Chhuanvawra ziak Mizo Tawng Dictionary (A lam rik dan nen) tih chu a tlangzarh nghal bawk.

MAL te din champhaphak April ni 23 chu hripui leng avanga hman theih a nih tak loh avangin  kum tawp inkhawm nen kaihkawp a ni a. An din champhaphaka an tih thin, Book of the Year lawmman hlanna chu vawiin inkhawmah hian neih nghal a ni. MAL dan buin a sawi angin Book of the Year 2019 thlangtu Committee din a ni a, he Committee hian thutkhawm vawi 8 an neih hnuah MAL Executive Committee ah rawtna an chhawpchhuak a. Kum 2019 chhunga Mizo irawm chhuak lehkhabu 231 zingah Falung chu Book of the Year 2019 atana thlanchhuah a ni.

Nimin programme hi MAL Vice President Pu C.Chhuanvawra’n a kaihruai a, an pawl hmalak dan report ngaihthlak a ni bawk.

Post a Comment

0 Comments