ZAIMITE HUANG: Zaithiam leh Hlaphuahthiam - Senes Chhakchhuak

Zaithiam leh Hlaphuahthiam Senes tia hriatlar, C Lalmalsawma kan belchiang.




'Saw nu saw a hmel a tha' tih hla atanga hriat lar leh 'Mizo Nula' tih hla-ah Zofate inpumkhatna rilruk rana Zohnahthlak nula - Kuki nula model atana hmangtu Senes tia hriatlar C Lalmalsawma ( Chhakchhuak) hi C Lalmuanpuia leh Lalzapliani te fapa niin, unau Mipa pathum zinga a milai a ni.

Sena/senes tia koh thin niin, December 3, 1987 khan a piang a. Model veng, Aizawl-ah chengin an khawsa a, Presbyterian Kohhran a lawi an ni.

Zirna lam:
Pawl 10 aṭanga i zir san ber i zirna institute leh i zawh kumte
 - Class 10_12, hi Synod Higher Secondary School. Aizawl. Class 12 hi
 kum 2008 khan ka zo a.( Hna avangin  College hi ka kal zawm ta lo. Ka rawn thai lang ve mai mai) 


Music video tihchhuah tawh zat:
-  Official Music Video chu pathum. 
1. Hlim takin Krismas ft. Shirley. L. Fanai. (2018) 
2. Saw nu saw a hmel tha Ft. Tlangval Tlumtea (2019) 
3. Mizo Nula Ft. Tlangval Tlumtea & Lil' Me (2020) 
Lyrics video hi pahnih. 
1. Min duh lo der Ft. Tlangval Tlumtea. (2020) 
2. Ka Phal lo Ft. Shirley L. Fanai. (2020)



Hla i phuah ṭhin em?
- Phuah ve thin e.. 😀
Phuah tawh zat, a hla hming nen?
-1. Kristian Thalai (Model Veng Branch KTP kum 2017 sports Theme song) Gospel Rap
2. Hlimin Vanglai i chen ang (Gospel Rap) 
3. Lalpa Hmangaihna (Gospel Rap) 
4. Sakhmeltha mahse i sual
5. An mawi ngei e. Y. M. A
6. An mawi ngei Team John
7. Daih maw, Va ziaawm ve. 
8. My Bonita
9. Ka hmangaih che
10. Hmangaihtu Thinlung
11. Hlim zan
12. Hlim takin Krismas
13. Ka Phal lo
14. Ka zawng hmu ta
15. Vawng dun zel ang
16. Hringnun khawvel
17. Engvang nge? 
18. Saw nu saw a hmel tha. 
19. Min duh lo der. 
20. Mizo Nula
Phuah zawh lo a awm nual😀😀



Award dawn tawh zat: 
- Music industry ka luhchilna hi a la rei lo a Award dawn hi  ka la nei lo. Mahse Zonet Thazual Award 2020 ah hian Best Group/ Duo Lengzem Nominee ah kan tel ve  hlauh mai. 😃

Mizo Nula (MV)



A duhzawng leh ngainat zawngte:
Rawng -  A dum leh A var
Chawhmeh  -  Sa leh mizo Bai abikin Bawkbawn bai😀😀
Incheina - T_shirt leh Jeans, Kekawrbul nen
Rimawi – Hip Hop,Reggaeton Music
Mizo Ziaktu zingah -  Pu Vanneihtluanga
Hla-  Hip hop, Reggae, classic(Mizo ah pawh sap ah pawh) 
Hla phuahtu - Pu Zirsangzela Hnamte

Saw Nu Saw  A Hmel A thA (MV)

Mize ngainat zawng:
- Nihna anga lang, mi frank tak, mi hlim thei tak


Mize ngai nat loh zawng:
- Mi dangte ngaihtuah lem lo va ri deuh phawr phawr chi hi. 😀


Hobby- Hla Ngaihthlak, Thian kawm, Lem ziah, Painting

Relationship status - Single!

Kawppui atan duhzawng:
- Mi taima leh zaidam, rinawm leh min ngaihsakthiam a ni mai. 🤣


Zawhna dang:
1. A tel lova i awm theih loh: Thian te, Ka Cell Phone leh ka sana

2. I nun kaihruaitu: Thu tak,dikna leh rinawmna

3. Hringnuna i hlauh ber: Mi te rin loh nih.

4. I tih ngai miah loh tur: Ka mihringpuite duh loh zawng leh Pathian duh loh zawng. Mi dangte an thatna lai hmuh kán a an chhiatna lai sawi reng te..hetiang ti ngailo tur hian ka beih nasat erawh angai hle. 

5. Mizo Tualzal nuna ṭha i tih:  Tlawmngaihna leh Chhiat that kan tawh pawh a Kristian, Ringtute kan nih anga kan intanpui tawn zel thin hi.

6.  Quote i duh ber:  Thahrui chakna leh beih hram hramna hian eng dinhmunah pawh mi tlingah min siam thei thin. _Theodore F. Merseles


7. Mizote tan 'Fa neih tlem' inzirtir hi a ṭulin i hria em?
- A tul ka ti lo. Mizo te hi hnam naupang leh tlem kan ni a, tun aia nasa zawk a fa neih tam inzirtir te  hi uar a tul zawk ka ti.

8. Khawtlang, Kohhran leh nangmah:
- Ka phak ang tawk chuan kohhran leh khawtlang lamah hian ka inhmang ve a,  YMA lamah ni se mitthi in tlaivar leh thlanlaih hi chu ka tih ngei nhei turah ka ngai.
KTP lamah pawh phak ang tawkin ka inhmang ve a, inhmang lo ila chuan tuna ka thlen chin leh nihna hi ka ni pha kher lovang. KTP ah Group lamah hian Secretary ni lai ka ni a, kohhran lamah hian Naupang Sunday School ah hian Secretary ka ni mek bawk. 
Tin, ka'n sawi lang ve mai mai ang a, kum 2019 khan ka phû loh pui chawimawina 'Member  Of The Year' ( Mipa)( Model Veng Branch K. T. P Award) ka lo dawng ve tawh bawk a. Ka phak ang tawkin inhman zel pawh ka tum.

9. Social Media leh Nangmah:
- Social Media hian min tibuai lem lova, Facebook, Instagram leh Whatsapp te chu khawihin hmang ve bawk mah ila, ka nun a kaihhruai loh bakah harsatna min siam lem lo. In siam tir ka tum lem lo bawk.


10. Mizo ṭhalaite hian ngaihsan tur dik an ngaisangin i hria em?
- Hre lo, tunlaiah chuan thiamna te a sangin kan khawvel pawh a changkang chho zel a. Changkanna chuan min luhchilh ve zel a, khawthlang lam nun dan leh tih dan kan entawn nasa a, kan seng lut ve zel a, hmasawnna chi khat chu a ni. A tha, mahse an nun dan leh tih dan tha lam entawna seng lut lovin an chin dan tha lo te kan culture ah te ka la lut ve zel a. Hei hi chu a tha lo ka ti a ni. Ngaihsan tur dik kan ngaihsan thin loh avang hian kan nih tur ang pawh ni zo lovin thalai tam tak chuan mual min lian san a.
Ze nghet kan nei lova tum ruhna leh taimakna kan tlachham a.. Chu chuan kawng dik lo zawkah min hruai ta thin a a pawi khawp mai. 
5. Ngaihsan tur dik nia i hriat:  mi rinawm, taima. Thawhhreh nei lo, Dikna leh ze nghet nei. Nihna anga lang ngam. Pathian tih mi te. Tin, taimakna leh tumruhna avang hlawhtling ta te, harsatna  an tawh pawh a beidawng lova ti hram hram thin, tei rei peih te hetiang mite hi ngaihsan tur dik an niin ka hria.


11. Hlawhtlinna tura pawimawh:  Hlawhtling tur chuan thawhrim angai a, thawkrim tur chuan taimak a lo ngai leh zel a, tin, hrisel te pawh hi alo ngai khawp mai. Eng pawh ti ila kan teirei peih te hi a ngai khawp mai... Hlawhchham chang te pawh a awm ang.. Chutah chuan beidawng a duhtawk mai lovin fing leh fel zawk a bul tan that lehna hun tha a ni tih hria a, sawi leh selna karah pawh ni se, tum mumal tak neiin theih tawp chhuah a, thahrui chakna nen a beih hram hramna nun kan neih a mahni inthunun theihna nen Pathian tih chunga kan tih hi hlawhtlinna  rahbi pawimawh tak a ni in ka hria. 

12. I nuna hloh i hlauh ber: Min hmangaihtu  ka chhungkuate, thian tha te leh ka nihna dik tak hi.


13. Zofate inpumkhatna hi a tak a thlen theih i ring em?: aw, ring e. Sawi tawh ang khan zofate hi hnam tlem te kan ni a, engkimah inremna leh inhriatthiam tawnna te hi nei zel ila, inhmangaih tawnna nen keimahni lo hi remna pe theitu an awm chuang lo a ni tih hriain keimahni chhungrilah inremna hi nei i la. Zofate inpumkhatna hi chu atakin a thleng thei em em ang. 

14. Hnam dang nupui pasal neih hi:
- A tha ka ti lo mai pawh ni lovin sawi mawi pawh hi a tha ka ti lo. Mahni hnamah chiang ila mahni hnam ngaihsan nachang hria ila. Mahni hnampui ngei mai mizo nula/tlangval ngei mai hi nupui/pasal atan nei ila, nakin zel atan pawh a lo tha ber mai. Mizo kan ni kan hmel a tha an tih kha maw...😀


Thalaipuite hnena chah duh:
Aia upa te zah thiam ila, Hma  thlir thui tak nei bawk se.
Tin, hnathawh hi hreh lovin eng hna pawh nise taima takin thawk ila, chu chuan hlawhtlinna a keng tel a ni. Kan hna chu a hniam emaw sang emaw ei zawn nana kan hmang a nih chuan zahpuiawm hi a awm ka hre lova. Riinawm taka kan thawh chuan a zahawm mai thin a, tin zanlai rimawiah a chang mai zawk thin. 
Kan hnamah chiang ila. Ze nghet cherh chawrh nei bawk ila. Engpawh ti ila dikna leh rinawmna, taimakna nen Pathian tih chung zelin leh remna siamtu leh ngaidamtu ni thei zel ila. Mahni inhre chiang a mi nun danah buai lovin tum ti ruh i la a tha khawp mai. 
"A tha berah i rinna nghat la, tha i tih ber atan tum bik nei la, tha i tih ber aia hniamah chuan i lung ti awi mai suh. Theih tawp chhuah la a tha ber chu alo inher chhuak mai ang". Ruihtheih thil lakah lo fihlim hram hram la. 
I theih ang kawng kawngin, i theihna hmun hmunah, i tihsak theih a piang te hnenah thil tha i tih theih a piang chu ti zel rawh. 
Tin, kan that lai hian eng kohhran pawh nila Thalai pawlah phak ang tawkin in hmang zel i la, kohhran lo bel tlat ang che. Kohhran leh khawtlanga inhman hi mi pangngaia min siamtu tha tak a ni. 


EXPLOREMIZORAM.COM i hmuh dan:
- A tha ka ti khawp mai. Mi chanchin,( kan milar ho te pawh an ni ang) thil chi hrang hrang chip chiar zawkin exploremizoram.com kaltlang hian kan hriat chian loh leh hriat ngai loh te kan lo hre thei a, a hlu in a bengvar thlak  khawp mai. A kal zelna turah pawh duhsakna ka hlan a e. 
Ka lawm e.




Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments