Hlimhlimi Hmar leh RPa Ralte-in Krismas hla tichhuak dawn!

Aizawl | November 26, 2020: Mizo Zaithiam lar Hlimhlimi Hmar leh Zaithiam baka Hla phuahthiam Rpa Ralte chuan Krismas hla music video thar an tichhuak dawn.

He hla hi nakzan hian ZONET Cable TV ah leh Youtube lamah dah tum a ni a, rokhawlhna dang a awm loh chuan music video mawi tak kan hmu thei dawn e.

He an hla thar tur hi "Lalber Thar ( Ngai ru)" tih a ni a, RPa Ralte phuah hi a ni nghe nghe a ni.

RPa Ralte chuan, "Kum dang angin Christmas hmang thei dawn lo mah ila, kumin chu a vawi khat nan gospel singer zaithiam tak Hlimhlimi nen Christmas hla thar tih chhuah tur kan nei dawn a. He hla hi Christmas hla ka phuah kan tih chhuah vawi hnihna tur a ni dawn a. Kum 2016 khan Christmas hla "Angelte Zai Ri" tih kha kan lo ti chhuak tawh bawk a. Kumin a kan hla tih chhuah tur hi a title ah  "Lalber Thar ( Ngai ru2)" tih a ni dawn a ni." a ti a.

Hlimhlimi nena Video an siam chungchangah RPA Ralte chuan, "Hlimhlimi nen hian kan inhmuh vawi khatna atang khan, hla siam dun hi kan chak thei em em a, kan sawi kan sawi dun thin a. Mahse project hrang hrang vangin kan ti dun thei lawk lo a. Krismas hla hi hun chep tak karah kan siam dun a ni." a ti.

Rpa chuan, "hla kan phuah chungchang ah hian Hlimhlimi hi ka fak em em a chhan chu, thil tam tak lo contribute a nei a. Amah hi zaithiam a nih mai piah lamah hla phuah pawh a thiam em em tih a lang a ni. Idea tam tak a lo thawh a, a tawp lamah, 'alo piang ta' tih lai line te hi, ama kut chhuak liau liau a ni a, a hla hi a chawi em em a ni."

He hla hi a music lam ah chuan, pop music, up beat deuh ani a. Lawm pawh a rem phian a. Chuan a music hi celtic (irish) music rawng kai tep in violin line te a awm a. Chuan instrument ho hi acoustic ri an hmang hlawm a. Guitar ah acoustic guitar, chuan drums leh thil dang dang ri pawh acoustic deuh hlir ani. Guitar hi Ephraim -in a perh sak.

Music video ah hian Hlimhlimi idea a tam ber a. Ani hi a lam dawn bawk a, zaithiam piah lamah lam te leh zel a thiam em em a, music video a ti hmuhnawm leh zual em em dawn a ni.