Ramri buai kara Zofa inpumkhatna thleng-ah Zofa Global Network lawm

Aizawl | November 6, 2020: Zofa Global Network (ZGN) chuan thuchhuah siamin ramri buaina vanga Mizoramin harsatna a tawh mek laia hmun hrang hranga cheng Zofate inpumkhatna, inlungrualna leh thahnem ngaihna hrang hrang thleng chu lawmawm an tih thu leh a thlamuanthlak thu an sawi.

ZGN chuan, "Kan hriat țheuh angin Assam-Mizoram ramri buai chuan lehlam lehlamah inhriatthiam loh tawnna leh rah duhawm lo tak a chhuah mek a. Hemi avang hian Mizoram mipuite'n kawng hrang hrangah harsatna tawkin Economic Blockade thlengin Mizoram tan harsatna sìam a ni." an ti a.

ZGN chuan Zofa hnam hrang hrangte inpekna an hmuh thu sawiin, "He buaina kârah hian khawvel hmun hrang hranga Zofate (Chin-Mizo-Kuki-Zomi), a bikin Manipur, Tripura, Shillong, New Delhi, North Cachar Hills, Myanmar leh Bangladesh lam ațang te-in Mizoram mipui thlavàng hauhna, thlàwpna, thlamùanna leh puih in inhuamna te, a tak ngeia Mizoram puihna tura tha leh zung in sènna te kan lo hmu e." an ti bawk.




Zofa Global Network (ZGN),  "hetianga tlâng hrang hranga Zofate'n Mizoram mipui laka țhat in chhuahna leh in thlamùanna hi a ropui kan tiin lawmthu kan sawi tak meuh meuh a. Hei hian khawvel puma Zofate inunauna, inpumkhatna leh thinlunga inzawmna a tihngheh zual zel kan beisei." an ti bawk.

Post a Comment

He post chungchanga i ngaihdan lo sawi ve rawh:

Previous Post Next Post