Cachar district Official-ten Saihapui V tlawh leh

Phainuam | November 6, 2020:  Assam lam sawrkar official te  ramri hi an vei bik deuh nge ni nimin dar 2 bawr vel khan Cachar DC, SP leh DFO bakah public thahnem tawk tak nen Phainuam area a Lei thlengin an lo kal leh a, Assam DC hian tum hnih alo tlawh tawh a, DFO leh SP te hian tum thum vel an lo tlawh tawh bawk a ni.

An lo kal apiang hian IR duty te cross ngeiin an lokal thin bawk a ni. Kan ngam lo hle chu niin a lang. Saihapui V duty post ti chhia in an luah zui a, a khat tawkin sawrkar official leh public ten min rawn in-show khum deuh reng hi a ni bawk.

Nimin lamah Saihapui  V lamin puihna an ngen avang leh information an rawn pek avangin Phainuam thalai eng emaw zat an kal thla a, an thlen thlak hma hian Saihapui V unau te an awm avangin tlem an ti deuh nge ni Assam Civil mi an tam khawp mai a, IR te duty na Lei hi rawn pelh an tum ut ut a, Phainuam thalaite an thlen thlak tuk tuk takah chuan rawn pel ngam lovin an dai ta a ni.

Saihapui V a IR duty-na hmunah hian Mizoram atangin Kolasib SP, Vairengte SDPO leh OC te an awm ve vek a, inbiakna mumal pawh awm lovin Assam lam hian be chuang lovin sikul bomb darhna hmun te an rawn en a, tin, Phainuam  Mizoram area chhunga Pu R Lalhmingliana leilet a vai in kang te pawh an rawn en nghal bawk a ni.

Ramri pela  Assam official te rawn lut chhen hi Phainuam VC, YMA, Task Force chuan a ngaihmawh a, kan official te thu lo chuan kan ram chhungah hetiang a thlen tawh loh nan hmalak tum a ni bawk.

-  Buanga Singson