Phainuam bomb puak chungchanga Mizoram Sawrkar Home Department thuchhuak

Mizoram Sawrkar Home Department chuan Phainuama bomb puak chungchangah hetiang hian thuchhuah a siam:-

7.11.2020 (Inrinni) zing dar 2 hma deuh khan Assam leh Mizoram inrina hrula Phainuamah mimal rama Bengali Medium School Building-ah mi tu tih hriatloh ten bomb an ti puak a, School Building a chhe nual tih hriat a ni. Hemi chungchang hi rang takin Sawrkar chuan a bawhzui nghal a. A hmunah Mizoram Police te leh Mizoram Forensic Team te tirh nghal an ni a. He thil thleng avang hian Pu Lalbiakthanga Khiangte, DIG (Northern Range) pawh a hote nen a hmun an pan nghal a ni.

Kan ram chhunga zirna school-a hetiang thil duhawm lo thleng hi Sawrkar chuan pawi a ti tak zet a. Vairengte Police Station-ah case register nghal a ni.

Ramri chungchang avanga boruak tha lo leh harsatna thleng mekin ziaawm lam a pan chhoh mek laia boruak thalo siam belh thei thil thleng hi Sawrkar chuan pawi a ti em em a. A rang thei ang bera chhui chhuah a nih theihna turin Sawrkar chuan hma a la chhunzawm zel dawn a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post