Mizoram hi India tan Sports Power house a ni; Covid 19 dona kawnga Health minister Dr R Lalthangliana leh officer te hmalakna hi chhuanawm ka ti takzet - BJP National Spokeperson M Kikon

Aizawl | November 30, 2020: BJP national spokesperson - Mizoram incharge M Kikon chuan vawiin khan thuthar thehdarhtute kawmin,  "Covid 19 dona kawngah hian Health Minister zahawm tak Dr R Lalthangliana leh Chief Secretary leh Officer te hmalakna hi chhuanawm ka ti takzet a ni." a ti.

M kikon hi BJP national spokesperson - Mizoram incharge a nih bakah Science and technology-ah adviser of Govt of Nagaland a ni bawk a ni.

M Kikon chuan, "Mizoram a Covid 19 hripui dona kawngah hian mipuite tan rualna avangin, Mizoram hian a ti tha takzet a, Kohhrante, YMA te leh Local Level/Village Level task force te inpekna hi chhuanawm ka ti takzet a, hrikai zat leh thi zat ah pawh Mizoram chu a hniam fal hle a, hei hian vantlang tanrual apawimawh zia a lantir hle a ni. He State chhunga Covid 19 dona kawngah hian Health Minister zahawm tak Dr R Lalthangliana leh Chief Secretary leh Officer te hmalakna hi chhuanawm ka ti takzet a ni." a ti a.

"Constitution ammendment 125-na Parliament a putluh taka BJP intiamna hi sawinawn ka duh a, chubakah Autonomous District Council te thuneihna pekbelh thuah, he Bill hi pass a nih hunah chuan Finance Commission hnenah Autonomous District council te Direct a, Fund pek theihna thuneihna a pe dawn a ni. He Bill hi Parliamentary Standing Committee ten an zir chiang mek a ni. Standing Committee ten report an thehluh hunah chuan Mizoram a Autonomous District Council te hnenah thuneihna pek belh a nih theih nan Sixth Schedule hi Amendment siam a ni ang.  He thil hi Minority te tih hmasawnna tur a, Mizoram State tan Special Provision a ni ang." a ti bawk.

Ministry of Youth Resources & Sports leh Ministry of Minority Affairs ten Mizoram Sorkar hnenah Special Package an pe a, Pu Modi-a Prime Minister duhsak bikna in, Union Minister Pu Kiren Rijiju enpuina hnuaiah pek a ni. Central Ministry pahnih ten Mizoram tana Fund an pek thu a sawi a.

PMJVK Fund Mizoram tana pekte hi Minority te leh Mizoram State pum tan chhenfakawm tak a ni tiin, Pu Kiren Rijiju Union Minister for Minority Affairs chuan Central in Mizoram tana Fund a pek hi duhsak bikna lian tak niin a sawi a, Project dangte pawh pek tur a buatsaih mek a ni a, Mizoram hmasawnna turin Central Sorkar hian a pui zel dawn a ni, a ti bawk.

"Mizoram hi India tan Sports Power house a ni a, Sports lamah Mizoten an thawhhlawk em avangin, lawmthu sawi nan leh Mizoram atanga infiam mite chawisang turin Prime Minister zahawmtak Pu Modi-a chuan Project leh Programme tamtak a pawmpui a ni. Khelo India hnuaiah Pu Kiren Rijiju hian Sports Ministry atangin   Project thahnem tak a pawm bawk a ni." a ti bawk a ni.