Mipui him nan Lawngtlai bawrhsapin thupek chhuah

Aizawl | November 12, 2020: Mizoram sawrkarin COVID-19 hri leng mek laka mipui him zawk nan Mizoram puma "COVID-19 No Tolerance Fortnight" hman tura thupek a chhuah chu ni 30.11.2020 thlenga hman turin a pawt sei.

Hemi hun chhunga Lawngtlai District mipuite'n COVID-19 laka himna tura sawrkar dan siam leh thupek te tha taka an zawm theih nan Lawngtlai District Magistrate Dr Andrew H Vanlaldika, MCS chuan nimin khan CrPC (Criminal Procedure Code) 1973 section 144-na tlawh chhanin a hnuaia thupek hi a chhuah.

"1. Zan dar 8:00 atanga zing dar 4:30 inkarah Lawngtlai khawpui chhungah tu mah pawn chhuah phal a ni lo.

"He thupek hian a hnuaia tar lante hi a huam lo vang:

1. COVID-19 official duty,

2. Medical duty,

3. Magistrate leh Police leh Home Guard duty-te,

4. Chanchinbu mi leh electronic media-a thawktute,

5. Fire & emergency service duty,

6. PHE leh P&E Department hnuaia emergency duty-te,

7. Medical emergency leh thihna avanga chhuah ngai, an veng VLTF lehkha keng,

8. VLTF member duty-te,

9. LADC Task Force on Disaster duty-te,

10. District Magistrate leh Sub-Divisional Magistrate-in phalna an pekte."

He thupek hian thu leh a awm a nih loh chuan ni 30.11.2020 thleng a huam ang a. A bawhchhia chu IPC (Indian Penal Code) section 188-na hmangin hrem an ni ang.