INDIAN CONSTITUTION DAY PUALIN, A ȚOBUL ȚHENKHAT TE



Nov 26, 2020, Ningani: Narendra Modi Sorkar chuan kum 2015 khan Babasaheb Bhimrao Ambedkar pian kum 125 denchhenin kumtin November 26 hi Constitution Day or Samvidhan Diwas atan a puang a. Ministry of Social Justice and Empowerment chuan hemi chungchang official/gazette notification hi November 19, 2015 khan a ti chhuak a.  Hemi kum ațang hian kumtin November 26 chu Constitution Day or Samvidhan Diwas atan hman a ni ta a, he ni hi India Constitution duangtute zah leh chawimawina ni atan leh  India ram mitinin Danpui an ngaihpawimawh theihna atan duan a ni. Hemi hma hian November 26 hi India ram law minister hmasa ber Dr BR Ambedkar zah leh chawimawina ni atan hmangin National Law Day atan hman a ni țhin. 





Kumin 2020 hi India Constitution pawm anih kum 71 na lai alo ni  tawh a, hemi avang hian nikum  November 26, 2019 ațanga kum khat chhung  November 26, 2020 thleng chu India ram pumah Indian Constitution in a sawi tlangpui leh Constitution in mipuite tih ve tura a phut hrang hrangte inzirtirna atan hman tur a ni. Vawiin pawh khan ram chhung hmun tam tak, Sorkar office etc ahte *Preamble* sawi rualin Constitution Day hi hman a ni ang. 


*Constitution țobul* :
August 15, 1947 ah India in British kut ațangin independent hmu mahse ram rorelna beh chhan tur Constitution a neih nghal mai loh avangin Indian Constitution peih fel anih hnu January 26, 1950 khan mahnia ro inrel ram niin Constitution hman țan ni hi *Republic Day* a ni.

Kum 1934 ațang tawhin Constituent Assembly dina Constitution duan țul tihna a awm tawhin, Communist Party hruaitu MN Roy kha chutiang ngaihdan nei hmasatu a ni a, a hnu lamah Congress Party in an pawm ve zui. Kum 1940 ah British Sorkar chuan Constituent Assembly din chu rem a ti ta a.

Independent hma kum  December 9, 1946  khan Constituent Assembly țhut hmasak ber chu țhut khawm a ni a, Constituent Assembly President hmasa ber chu Sachchidananda Sinha a ni. August 29, 1947 ah Draft Constitution duangtu tur Drafting Committee ruatin Chairman atan BR Ambedkar ruat a ni. November 26, 1949 ah Constitution siam/duan  hna chu an thawk zo a. Hman theih tura peih tak tak erawhchu January 24, 1950 a ni a, hemi hnu ni hnih January 26, 1950 ah Constitution chu India danpui a puan niin India ram chu mahnia ro inrel tak tak ram a lo nih tak avangin he ni hi *Republic Day* tih a lo ni ta. 
*Constituent Assembly* :
Constituent Assembly hi December 9, 1946 a țhu tanin January 24, 1950 thleng a awh a, ni 116 chhung țhu khawmin session vawi 11 an nei. Drafting Committee in Consultation an duan uluk takin an sawiho a, siam țhat leh siam rem ngai an khawih bakah English ațanga Hindi a lehlin hna an khawih tel bawk. Constituent Assembly sawihona (debate) hi a pawimawh em avangin a ngaihnawm a, Secularism chungchang  leh thil dang tam tak an sawihonate chu thufing pui pui a ni a, secularism preamble ah hemi hnu kum 30 dawnah seng luh a ni leh ta a ni.

PREAMBLE ah hian atirah chuan "sovereign democratic republic" tih a ni a, 42nd Amendment ah khan *socialist, secular* tih belh a ni.

42nd Amendment hi Emergency lai a ni a, November 2, 1975 ah Constitution Amendment Bill Lok Sabha ah putluh a ni a, Rajya Sabha in November 11, 1976 ah pawmin President in December 1976 ah remtihna hming a ziah hnan a, January 3,1977 ah hman țan a ni.

Constituent Assembly lai ațanga *Secular* Constitution a dah duhna Nehru leh Ambedkar te leh midang tam tak ten an neih chu a hnu kum 27 naah a hlawhtling ta a tih theih ang. He 42nd Amendment hi Emergency lai anih avangin Constitution Amendment zinga dan khawih danglamna Article 50 dawn lai a awm avangin sawi hlawh tak a ni a, chung zingah chuan Fundamental rights hlihna pawh a tel.

India Constitution hi khawvela ziaka awm  Constitution sei ber a ni. A siam hun chhung hi kum 2 thla 11 leh ni 17 a awh.

India Constitution ah hian PREAMBLE bakah 448 article a awm a, chung chu part 25 ah țhen a ni a, schedules 12 leh appendices 5 a nei bawk. Dan siam țhat hi vawi 104  a awm tawh bawk. 


HRIAT TUR PAWIMAWH TE
_1. Constitution of India siamna atan hian ram hrang 10 Constitution rawn leh entawn a ni, chung ram te chu : Britain, Ireland, Japan, USA, South Africa, Germany, Australia, Canada, France, USSR_. 
_2. Dr. BR Ambedkar chu drafting committee chairman a ni a, a thawhrimna avang hian "father of the Indian Constitution" atan ngaih leh pawm a ni_. 
_3. Constitution of India, a tira kut ziak bu (hand written copy) English version-ah hian thu mal 1,17,369 a awm a ni_. 
_4. Original Constitution, kut ziak copy ah khan MP 283 ten an hming an ziah hnan a ni_. 
_5. Original hand written copy hi Library of Parliament House ah helium file case hmangin uluk taka vawn țhat a ni_.


Source :
legislative.gov.in
First Post 
November 26, 2020 
@ 10:31 IST
NDTV Nov 26, 2020 
Money Control 
November 26, 2020 
@ 12: 39 IST
====26==11==20====
Huna Kawlni Kawlvawm

Post a Comment

0 Comments