BREAKING NEWS: Lalduhoma MLA aṭangin ban

• Mizoram-ah a vawikhatna atan MLA nihna hlih a ni.

Aizawl | November 27, 2020: Serchhip bialtu MLA Pu Lalduhoma chu vawiin khan Mizoram Assembly speaker Lalrinliana Sailo chuan MLA aṭanga banna thu a puang.

He thutlukna puan dawn vang hian Assembly House chhehvel leh Raj Bhavan tual-ah ZPM party mi leh sa tam takin lungawi lohna an lantir a ni.

Lalduhoma hi MLA inthlan 2018 khan Independent candidate niin Serchhip bial aṭangin thlan tlin a ni a. Thlan tlin a nih hnuah ZPM ah a luh vangin MNF MLA 12 te chuan Assembly speaker hnenah hekin, vawiin khan ban a ni ta a ni.

ZPM Legislature Party leader Lalduhoma chu vawiin khan ban a ni.

Vawiin khan Mizoram Legislative Assembly Speaker Pu Lalrinliana Sailo chuan MLA 12-in Pu Lalduhoma MLA a nihna atanga ban tura Petition an thehluh chungchang thutlukna a siam chu dar 11:00 khan Assembly House-a a pisa ah a puang. Speaker chuan Pu Lalduhoma, 26 - Serchhip (ST) Constituency atanga Independent MLA-a thlan chu Mizoram Legislative Assembly Member a nihna chu hlih sak (disqualify) a ni ta tiin a puang.
Speaker chuan thutlukna hi a eng zawng pawhin siam dawn ila, thutlukna siam nuam lo tak a ni ve ve a, mahse a thutnain a zir miau si avangin ti lo thei lo a nih thu a sawi a. Speaker chuan Pu Lalduhoma ban chungchanga Petition a hnenah lo lut chu uluk taka a zirchian (examined), ngaihtuah leh hetiang case chungchanga Parliament leh State Legislature hrang hrangah te an lo kalpui dan leh Speaker ten ruling an lo siam tawh te a zir hnuin thutlukna a siam tih a sawi bawk. Assembly Session lai ni sela chuan a thutlukna chu House-a chhiar chhuaha puan tur a ni a, Session lai a nih loh vangin leh hripui len lai a nih avangin Speaker Office atanga puan a tul ta a ni, a ti.
Speaker chuan Order a siamah  Respondent Pu Lalduhoma, Independent Candidate chu eng political party mahin Candidate atana a chhawpchhuah ni lovin thlan tlin a nih hnuah amah ngeiin a pawm leh a puan angin Zoram People’s Movement Party chu 19/8/2019 ah zawmin, hemi hnua a chetdan leh a khawsak zui dante avangin a chungah Ram Danpui (Constitution of India) Tenth Schedule Para 2(2) chu amah ban tirna turin hman a lo ngaih tak thu a sawi. Chumi dung zuiin Ram Danpui (Constituition of India) Tenth Schedule paragraph 6-na leh a hnuaia Dan siam Mizoram Legislative Assembly (Disqualification on Ground of Defection) Rules, 1987 ten Speaker thuneihna a pek angin leh a chunga sawi takte behchhanin Schedule 10-na Para 2(2) angin Pu Lalduhoma chu Mizoram Legislative Assembly Member a nihna atanga bantir a nih thu Speaker chuan a tarlang a. Hetiang a nih tak avangin Ram Danpui (Constitution of India) Article 190(3)-na angin, a thuthmun (seat) pawh ruak ta tih a puang bawk. 
Speaker hian Pu Lalduhoma MLA atanga ban (disqualify) a nih tih a puan hmain hemi chungchanga hma a lak dan te, MLA 12 te Petition a zirchian dan te, Pu Lalduhoma insawifiahnate pawh uluk leh ngunthluk taka ngaihtuah a nih thu Speaker chuan a sawi a. Supporting document zawng zawngte uluk taka zirchian a nih bakah Petition thehluttu MLA (Petitioner) te leh Pu Lalduhoma (Respondent) te a huhova amah hmaa thutkhawmna neiin sawi duh an neih ang angte sawina hun siamsak an nih thute pawh a sawilang. A sawi zelnaah Speaker chuan hetiang case lo awm tawh Jagjit Singh vrs the State of Haryana & Others case chungchanga Supreme Court thutlukna siam (ruling) chu a sawizau bawk a ni.

Post a Comment

0 Comments