'HEI HI ALL INDIA RADIO, LUNGLEI A NI'

(Silver Jubilee pualin aw..)

- Remmuana Chawngthu

Thuhma tawitein

AIR Lunglei chuan kum 25 (Silver Jubilee) a lo tling ve ta, chumi pual ve deuh roh chuan, he station nena inzawmna nei tam lutuk lo hian thu sepsel leh ningnel deuh ka han ziak ve leh lawk teh ang, ka lung a tileng tlat a.

A lunglenthlak mang e.

Lunglenthlak thu aṭangin bul han ṭan ngawt teh ang. Kan naupan lai aṭangin chhungkaw khawsak nuamsa fahran lo hi kan ni ve a (Tunah pawh eng teh ual phei chu kan ni chuang lo). Zanah hmun dang hla deuh deuhah hian mi inah T.V. en turin kan chhuak fo mai a; chutiang kan peih loh chang chuan ṭhenawm te ina Radio ngaihthlak a ni leh mai a.

 Ṭhenawm te inah hun engngemaw chen chutianga Radio kan ngaithlak hnuah mahni chhungkaw pualin Radio kan han nei ve a nih kha, ka va han ngaithla nasa tehreng em!

Radio zet chu,

Mahni chhungkuaa han kawl ve takah chuan mei lum aina bulah kan chhawp a, kan ngaithla ṭhap zel a nih kha. Khatih hun lai khan dar 6:30-ah Chanchin thar, Aizawla mi lakchhawn kan ngaithla a, a bika hlathlan te hlei hlei kha kan ngaithla nasa a; lengzem/lenglawng/Pathian hlathlan mawlh kha kan ngaithla nasa a. A hla ngaihthlak hmain hla thlangtute leh thlansakte, an thlan chhante nen lam khan kan han ngaithla phawt ṭhin kha a nia, a ngaihawm e, kha'ng hun lai kha.

Hlathlan kha.

A ngaithlak mai ni lo, hla han thlan kha kan uar ve khanglang a; khatih lai khan ka ṭhianpa pakhat chuan ka hmingin hmeichhia tu tute emaw kha hla a lo thlansak nasa mai ṭhin a, a zahthlak duh angreng khatih lai khan. Paper pakhat kha a laiah kan bung a, bung khat kha hla pakhat thlan nan, envelop-ah kan khung khawm a, mi kan thawn thla ta mai ṭhin a, a va'n lunglenthlak em!

Hlathlan chungchang han sawi takah chuan khatih laia hlathlan uar deuh deuh mi pathum, vawiin thlenga an hming ka la hriatte hi han tarchhuak lawk teh ang. 

Pakhat chu C.K.DENGCHHINGA, (LUNGCHEM) a ni a, ani kha ka hmuh chak nen, hla thlan a uar deuh hun lai khan chatuan ram min pansan ta daih a, a thih thu pawh kha Radio aṭang bawkin ka hria. A pakhat leh chu A-RINA (HNAHTHIAL LUNGLENG VENG) a ni ve thung a, ani kha a chanchin ka hre zui lutuk lo, telephone hmanga hlathlan a nih tawh chuan hla a rawn thlang ziah zel. Pakhat dang leh chu V.KUNGTEA (WEST SAIZAWH) a ni. Ani hi chu thu leh hla lamah thui tak a kal avangin social media-ah vawi tam kan inkawm hnuah a nau (Hruaia Vandiau) nupui neihnaah ka zuk kal ve a, kan inhmu ta, ka hmuh rualin a lukham bulah Radio a lo chhawp a, hai rual a ni lo. A bula awm a khamawm loh a; Pathianin min hruai sela, vawi khat chauh tal chu hmuh leh ka inbeisei a ni.

Hla ngaihthlak tam zualte:

Kha'ng hun lai khan hla ngaihthlak nasat bik deuh kha a awm ve a. A bika hlathlan hunah khan heng hlate - "Ka par mawite" leh "Chun nunnemi" (Lalsangzuali Sailo sak), "Lalpa i ram ka thlen hma zawng" (F. Vanlalpeki sak), "A bo tawh ang" (Maria K. Laldingliani sak), "Hawiloparmawi Isua", "Khaw thianghlim Jerusalem" (Rebecca Saimawii sak), "Khawpui" (Lalduhsaka Hmar sak), "Chawlhna ram" (Lunglawn Kohhran Zaipawl rem)...Ekhai! Sawi dawn chuan sawi tur a tam em mai, khiti zawng khi tarchhuak mai teh ang.

Lengzem/lenglawng hla mawlh kha kan ngaithla nasa zual a, khatih hunlai khan zan dar 9 a rik tawh chuan tlai tawh hlein kan hria a, kan mu tawh thin a. Zan tlai lamah LUNGLEN HUN a lo inher chhuak a, a va han lunglenthlak tak.

Heng hla - "Derna anka" (C.Vanlalzuia sak), "Suihlunglen" (C.Vanlallawma sak), "Buannel ram dai, Rose par rimtui, Dam takin mangtha, etc.(C. Vansanga sak, C.Vana zai hi kan ngaithla nasa thin khawp mai).

Lunglen hun tihlu zualtu dang.

 _"Hmangaihna ka ngen" (Lalṭanpuia Tochhawng), "Zanlai thlifim, Dawt leng an sel" (Lallianmawia Pachuau), "Ka hmangral leh ṭhin, Lunglen hnem dun ang" (Zirsangzela Hnamte), "Kumtluang par leh Nunhlui ṭahna" (Lalhungchhungi Pachuau), Sawmfang hmun mawi (H. Lalchawimawii) ...Ekhai! Sawi vek sen a ni leh lo, i duhtawk leh teh ang. Heng hlate hi a ni, lung tileng ṭhinte chu.

Hla lenglawng pawh tam tak tarlan chhuah chakawm a tam a, Pathian hla pawh chutiang tho chu a ni. I sawi thui tawh rih lo teh ang. 

Zaithiam dang- H. Lalṭhakima, R. Vanrammawia, Zira Hnamte, Sailothangi Sailo, Roliana Ralte, R. Vanlalzami, Thanga Zongte, (midang pawh sawi tur an tam mai, sawi sen an ni lo) zai te vawi duai lo kan ngaithlak hun lai te kha a ngaihawm. 

Zai lam mai ni lo, thu lama thawhhlawk tak tak, thu ṭha tak tak rawn sawitute kha an hlu hlawm ngawt mai.

Zing tinin "Kan darthlalang" hun mawlh kha a nghahhlelhawm ṭhin a, khatih lai phei kha chuan chanchinbu kan hmu ngun ve si lo a, infiamna chanchin mawlh te kha kan nghak ran ṭhin a ni.

Inrinni zan (ni tain ka hria) Top 5 countdown mawlh kha kan nghakhlel pek a. Khatih hun lai khan, C. Vanlalzuia, R. Lalbiaksanga, H. Lalṭhakima, te kha top 5 countdown-ah khan an lang ngun riau zel a ni, a va lunglenthlak tak em!

Hun a lo kal zel a, khawvel changkanna ten min chim thui tulh tulh a, T.V., Computer, Smartphone a lo chhuak tam tulh tulh a. Thangthar zingah a tla na lo ta deuh niin a lang. Mahse, a hlutna a nep chuang lo, a rei pawh leh a hlu tulh tulh dawn a ni.

Tunah Kum 25-na (Silver Jubilee) thlengin, tluang takin Pathian zarah bahlah awm loin tun thlengin a la kal thei hi lawmawm ka ti hle. A thawktute zingah ka ṭhiante fel tak tak an awm nual ve ta hial mai. Tluang taka kal zel turin duhsakna sang ber ka hlan e.

AIR LUNGLEI, VUL ZEL RAWH SE.