Gujarat MZP in zirlai tangkhangte tanpuina hman bang CM Relief Fund-ah hlan let!

"a bang chu kan ta ni lovin, sawrkar ta tho a ni a, mamawh zawk te'n an lo hman atan kan pe let a ni." - GMZP secretary

Aizawl | November 25, 2020: Mizoram Chief Minister Relief Fund atanga zirlai tangkhangte tanpuina atana an dawn atanga an hman bang cheng nuaih thum chuang chu Gujarat Mizo Zirlai Pawl (GMZP) chuan Chief Minister Relief Fund-ah an hlan let.


Hripui vanga khawvel a buai laiin, Mizo zirlai hmun hrang hranga tangkhangte tanpuina atan Mizoram sawrkar chuan Chief Minister Relief Fund kaltlangin pawisa a sem a. Chief Minister Zoramthanga chuan April 22, 2020 khan sanction order tichhuakin, India ram hmun hrang hranga Mizo Welfare/Pawl tangkhang leh ṭanpui ngaite ṭanpuina turin sumfai tam tak a pe chhuak a ni. 

Pawl hrang hrang te zingah Gujarat Mizo Zirlai Pawl te pawh Rs.7,30,000/- lai pek an ni ve a. Gujarat Zirlai Pawl te hian Covid 19 avanga zirlai tangkhangte leh ṭanpui ngaite puihna tur CMRF an dawn atanga an hman bang Rs.3,06,600/- lai mai chu online in CM Relief Fund ah hian midang, mamawh zawk te tan vêk an rawn chhung lût leh a ni.

He thu hi CM Zoramthanga instagram account lamah tarlan niin, "Hun harsa leh khirhkhan tak paltlang mah ila, kan inhmangaihna leh induhsaktawnna nen hi chuan a va a va thlamuanthlak si em! Gujarat Mizo Zirlai Pawl te Pathian in vengin awmpui reng che u rawh se," tiin a tawp a khar a ni.


Gujarat Mizo Zirlai Pawl chuan pawisa hi tum hnih-ah thunin, November 20 leh November 22 khan an thun let leh a ni.

GMZP chuan an lehkha-ah heti hian an ziak a, "CMRF atanga kan pawisa dawn te chu a hman na tur ang zawng zawng ah kan hmang tawh a. Kan pawisa hman dan report (as per Form - II of ‘Tangkhangte Tanpuina sem dan tura kaihhruaina’) pawh Finance Commissioner, Govt. of Mizoram hnenah kan thehlut tawh a, min endik sak tawh bawk a ni. Kan pawisa hman bang cheng ₹1,63,800/- hi ‘Chief Minister Relief Fund’ Bank Account ah kan rawn dahlet leh tawh a. Tin, ₹1,42,800/- chu Sanction Order awm lova kan account ah Ni 23rd May, 2020 khan a rawn luh avangin, chu pawh chu kan rawn refund tel nghal bawk e.
A vaiin ₹1,63,800 + ₹1,42,800 = ₹3,06,600/- chu thawh hnih (two phases) in kan rawn dahlet a ni tih kan rawn in hriattir e." tiin an ziak a ni.





GMZP secretary Ruth Lalrammawii chuan EXPLOREMIZORAM.COM zawhna chhangin, "Hman ban kan ngahna chhan chu, kan pawisa hmanna tur a kan lo hisap tam tak te (eg: Ration, Travelling expense) kha Gujarat Sorkar lam atangin min puibawm nasat avangin alo ngai leh ta lova, bakah Pathian zarah kan Lockdown chhung  khan COVID-19 +ve kan awm lo hlauh vang a ni." a ti a. "Sawi hmaih loh tur, Pi Saidingpuii Chhakchhuak, IAS Gujarat kaltlangin thil tam tak min buaipui sak thei a, thil tam tak a thlawnin kan tih theih phah ani." a ti bawk.

Zirlai mai awm khawm, nakin zelah mamawhna tam tak la nei tur ni sia an pek let kher chhan zawhna chu "Sum hi chu mamawh loh thu a awm lova. Mahse kan mamawh ang bawkin midang pawh in an mamawh ve tho si a, Sawrkarin min pek chhan leh kan hmanna tur tul ah te kan hmang a, a bang chu kan ta ni lovin, sawrkar ta tho a ni a, mamawh zawk te'n an lo hman atan kan pe let a ni." tiin GMZP secretary Ruth Lalrammawii chuan EXPLOREMIZORAM.COM  chhang.

GMZP hi an letter head-a inziak ang hian MZP general Headquarters Aizawl hnuaia inziaklut an ni.

Post a Comment

0 Comments