Aizawl | November 25, 2020: Nimin chhun khan Prime Minister Pu Narendra Modi chuan COVID-19 chungchangah state hrang hrang hmalakna leh he hrik danna tur vaccine hman a nih theih veleh a mipui a pek dan tur chungchanga ruahmanna sawrkar laipuiin a siam chungchangah state Chief Minister te chu video conference kaltlangin a sawipui.
Mizoram Chief Minister Pu Zoramthanga chu Health & Family Welfare Minister Dr. R. Lalthangliana, Chief Secretary leh Health Secretary ten an tawiawm a. NITI Aayog member Pu V.K Paul chuan sawrkar laipui ruahmanna tlangpui sawiin, vaccine he pekchhuah theih a nih veleh a thawh khatna atan ram pumah provisional priority group mi vbc 30 vel awm tura ruahman niin, chungte chu - healthcare workers, frontline workers, kum 50 chunglam (26 crores) leh kum 50 la tlinglo, natna dang association comorbidity nei te an nih thu a tarlang a. State leh Union Terroritory hrang hrang te nen inbia in, data collection pwah ngawrh taka kalpui mek a nih thu leh cold chain storage an mamawh dan te thlithlai sak bawk niin, December thla tir atangin State/UTs te tan cold chain storage tihchangtlunna tura an mamawhte supply tum a nih thu a sawi a ni.
Prime Minister chuan state tin te chu COVID-19 hri a darh zau belh zel loh nan fimkhur taka hma la zui zel turin leh tha thlah lo turin a chah a. Vaccine awm chu fimkhurna lama inthlahdul phah nan a hman chi a nihloh thu a sawi a ni.
COVID-19 hri darh zualna state pariat- Haryana, Delhi, Chhattisgarh, Kerala, Maharashtra, Rajasthan, Gujarat leh West Bengal hruaitute chu a hranpa in Prime Minister hian meeting neihpui bawkin, an hmalakna leh harsatna te a ngiahthlak sak a ni.
- DIPR
Post a Comment
He post chungchanga i ngaihdan lo sawi ve rawh: