MZU MA Education Gold Medalist 2020 Cordilia Vanlalhmangaihi

Mizoram University (MZU) M.A Education Gold Medalist 2020 Cordilia Vanlalhmangaihi kan belchiang.


CGPA 8.011 hmu-a MZU M.A Education Gold Medalist 2020 ni ta Cordilia Vanlalhmangaihi hi H Vanlalringa leh Lalbiakmawii te fa pathum zinga a upa ber niin, May 28, 1997 khan a lo piang a. An unau hi Mipa pakhat leh Hmeichhia pahnih an ni.



Cordilia Vanlalhmangaihi te hi Mission vengthlang, Aizawl-ah chengin an khawsa a, Presbyterian Kohhran-ah an lawi a ni.

Cordilia Vanlalhmangaihi hi Cory emaw Angaih tiin an ko thin.


Zirna lam:
1. Pawl 1 atanga pawl 10 khawiah nge i kal? eng zatna nge i nih thin, pawl 10 pass kum?
- Pawl 1 atanga pawl 7 hi Graceland school,Khatla ah ka kal a, pawl 8-10 hi Synod Higher Secondary School ah ka kal a, pawl 1-10 hi rank nei pawlah ka tel ngai lem lo, a vantlang pawl ka ni ṭhin. 😁 2013 khan pawl 10 hi first division ah ka pass.

2. Pawl 12 hi khawi atangin nge i pass? chuan, engah nge, a kum nen?
- Pawl 12 hi Holy Child Higher Secondary School, Shillong atangin 1st division ah 2015 khan ka pass.

3. zirna sang zawk i zir leh i zirna hmun leh kum?
- Kum 2015 khan Pachhunga University College ah BA(Education) ka zawm a, 2018 khan Pathumna niin  ka pass chhuak a,2018 ah vek  MZU (Education) ka zawm leh a, chuan tunkum 2020 ah hian ka pass chhuak a ni.


# I lehkha zir dan?
- Lehkha hi zir ngawr ngawr ang kha ka ni lem lo a, class explanation hi ka chhawr ṭangkai a, ka zir tam lo na a mahse ka zir chhunah chuan by heart lo in, hriatthiam tum in ka zir thin, zirtirtu lemah te ṭangin darthlalang hmaah te ka note te hi mizo ṭawngin ka in explain ṭhin.

# harsatna I hmachhawn dan?
Eng harsatna  pawh ni se, ka Ṭawngtai a Pathian kutah ka innghat tawp ṭhin.


# Gold medalist i nihna (Subject) leh CGPA?
-M.A Education. CGPA 8.011




Gold medalist ni tura i beih dan?
- Gold medalist nih hi ka chan turah ka dah pha ngai reng reng lo a, mi te angin study habits chhuan tlak pawh ka nei lem lo, he dinhmun hi Pathian khawngaihna vang chauh a ding thei ka ni a, "A ram leh a felna chu zawng hmasa zâwk rawh u; tichuan, hêng zawng zawng hi a pêk belhchhah dâwn  che u nia" tih hi  atak in min hmuh chian tir ani. Exam lai pawh nise, tling lo taka a rawngbawl ṭhulh hi ka duh ngai lo a, a tana tling lo taka ṭhahnem ka ngaihna te mal a sawm a ni.


Gold medalist ni tura i  beihnaah faculty lamin an ṭawiawm/pui ṭha chein i hria em?
- Aw hria e, kan zirtirtu te hi an inpe in an theihtawp kan tan an chhuah a, an ṭhahnem ngaihna leh in pekna avang liau liau a result ṭha nei thei hi ka ni.

I zirna atana i chhungte pawimawhna:
- Ka Nu leh Pa te hi zirtirtu ve ve an ni a,ka tet te atanga zirna lama min kai hruaitu ber anni a,ka engkim tak meuh meuh anni a, "Ro hnutchhiah tur cheu kan nei lo,in Zirna bak hi chu" tiin an theihna leh an neih ang zawng zawng te kan unau zirna atan an hlan thin a, an tel lo chuan tun dinhmun hi ka thleng thei ngai dawn lo a ni.

I zirna atana i ṭhiante pawimawhna:
- Ka ṭhian te hi ka tan hian an pawimawh em em a, class lama ka ṭhiante ho nen hian discussion te nei in  exam dawnah te kan hriat fiah loh leh thiam loh ang te kan in hrilh fiah thin a, chu chuan nasa takin min pui thin a. Material kan neih ang ang te leh class lecture kan ziah ang ang te kan in share thin a, chu chuan nasa takin min pui a, kan veng lama  ka ṭhiante pawh hian kan exam chang hian anmahni exam ve ang mai hian ṭawngtai na nen min lo pui thin a ka tan hian an hlu em em a ni.


A duhzawng leh ngainat zawngte:
Rawng - pink
Chawhmeh  -  alu, bawng sa.
Incheina - ka inhmeh zawng zawng. 😅
Rimawi – hard rock tih lo chu ka ngaina vek mai.
Mizo Ziaktu zingah - Mafaa hauhnar leh Lalhruaitluanga Chawngte.
Hla- take me home- Jess Glynne
Hla phuahtu - Rokunga 
Teacher - Zirtirtu hrim hrim chu ka ngai sang vek a,a hming hmera sawi tur ka hrelo
Leader - Mahatma Gandhi



Mize ngainat zawng:
- Mize thup lo. Mi biak hmasak leh nel hmasak hi ka harsat avangin, min be nghal a min kawm nghal bawrh bawrh tu te hi ka ngaina mai zel.

Mize ngai nat loh zawng:
- Dawt sawi hrat, mize thup ching , nih loh na anga lan tum thin leh rinom lo.

Hobby- Baking, lehkhabu chhiar

Relationship status - single lo.  😁

Kawppui atan duhzawng - mi rinawm, min ngaihsak leh min hrethiam tu, ka nihna ang ang a min pawm thiam leh Pathian min rin pui em em tu.



Zawhna dang:::
1. A tel lova i awm theih loh: Pathian.

2. I nun kaihruaitu: ka Nu leh Pa leh ka Bible.

3. Hringnuna i hlauh ber: Pathian tello a nun hman.

4. I tih ngai miah loh tur: Eirukna.

5. Mizo Tualzal nuna ṭha i tih: Tlawmngaihna.

6.  Quote i duh ber: Matthaia 6:33
 "A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia."

7. Mizoram leh Mizo tualzal nuna Mizo hmeichhiate dinhmun:
- te hi kan pawimawh in kan hriatthiam phak bak hian kan chanvo leh dinhmun hi a pawimawh a, mi ropui hring a enkol seilian thei tu kan ni. Tun dinhmunah chuan mizo hmeichhia te hi hman lai ngaihtuah chuan kan dinhmun chu atha tawh hle in ka hria a, zirna leh ei zawnna kawngah pawh kan dinhmun chu atha chho hrih viau  in ka hria.

8. Hnam hmingṭhat leh hmingchhiat kawngah Hmeichhiate'n mawhphurhna: 
- Mizo hmeichia te hian kan hnam kan tih hming that leh hming chhiat kawngah mawhphurna tam tak kan nei a, kan in chei duh dan te hnam dang zinga kan chet duh dan ah te leh social media a kan in pho lan duh danah te hian  nasa takin kan ko ah hian hnam hmingthat leh hmingchhiat na te hi a innghat in ka hria.


9. Hnam ziarang chawinun kawnga Hmeichhiate mawhphurna:
- Kan in chei danah te leh chhiat that ni a kan tih tur kan    hlen hian nasa tak leh awlsam tak si in hnam zia rang kan chawi nung thei a, mizo mipa zingah ngaihsan tur dik tak kan ngaihsan na te hian nasa takin kan mipa te hi acho chhuak thei dawn a, mithi ina lu men leh thingpui sem kawngah te, chu mai bakah puan bih uar kawngah te hian hma kan lak chuan hnam ziarang kan chawinung theia,hemi kawngah mizo mipa te pawh kan cho chhuak zel thei dawn a ni.

10. Mizote tan 'Fa neih tlem' inzirtir hi a ṭulin i hria em?
 - Mizo te hi kan la tlem em em a.fa neih tlem inzirtir hi a tulin ka hre hrih lo, kan hnam kan tam na na na chuan hnam humhalh kawngah pawh hma lak a awlsam zel zawk ka ring ani.

11. Mizo hnam ṭhanmawh bawk nia i hriat?
- Taihmakna te leh tumruhna kan tlachham lutuk  leh ngaihsan tur dik ngaihsan nachang kan hriat loh na hi kan thanmawh bawk  niin ka hria.

12. Mizo hnam damna atana  kawng awm nia i hriatte?
- Pathian belh hnem kan mamawh a, thil ho mai mai buai pui lo a buaipui tur dik tak Pathian kan buaipui a, a hminga Christian ni ringawt lo a, rinna dik tak nen amah kan belh chuan anin kawng dik ah min hruai in kan ram hi a dam thei ngei dawn ani.

13. Hnam chhan nana Hmeichhiate ṭangkaina leh mawhphurna?
- Hmeichhia te hian Mizo mipa ngaihsan tur dik tak hi ngaisang ila, kan fate pawh ngaihsan tur dik ngaihsan leh hnam hmangaih zir tir zel in, kan culture leh thil hrang hrang te zirtir ila chu chuan ṭhang thar zel ah ram leh hnam hmangaihna an thinlung ah atuh zel anga kan hnam boral mai tur hi kan chhan thei dawn ani.




14. Zirna, Khawtlang leh Kohhran hi?
- Zirna, Khawtlang leh Kohhran hi mizo kan nih chhung chuan thil kalkawp reng tur  lakhran theih loh thil ani a, khawtlang leh kohhran a inhmang lo mithiam chu an chhawr tlak tak tak  chuang lo a. chutiang bawkin khawtlang leh kohhrana inhmang zirna ngaihthah pawh hi an chhawr tlak tak tak  chuang loh. chuvangin heng thil hi mizo kan nih chhung chuan kan nuna bet tlat tur anih avangin a enga mah ngaihthah chuang lo a kan balance thiam hi a pawimawh em em a ni.

15. Khawtlang, Kohhran leh nangmah: 
- YMA leh KTP lamah te pawh a hmingin chanvo te nei ve in ka theih ang ang in ka inhmang ve thin a, heng atanga  ka experience te hi ka tan chuan zirna ina ka dawn loh finna leh zirna hlu tak ani, zirna ngaihthah si lo in heng ah hian a in hman theih a, kan rawngbawlna ringawt a ral lo in kan rawngbawl sak Pathian hi hrechiang ila anin a tana in pe te chu a thlah thlam ngai lo ani. Tin khawtlanga theih ang ang a inhman a mithi in lumen leh hnatlang a tel thleng hian kan hnam zia kan chawi nun na leh tlawmngaihna kan lanchhuah tir na pawimawh tak niin ka hria.

16. Social Media leh Nangmah: 
- Social media hi khawvel tuverh a min hawizau tir tu leh hriatna tam tak min pe tu ani a, hun ka khawh ral na tam ber pakhat ani bawk a,a tangkai em em rual hian ka hun tam zawk ka hman ral na anih avang hian min ei chhe nasa em em tu pakhat a ni.

17. Mizoram ṭhalai tam tak tlakchham: 
- Insumtheihna( self control)  leh taimakna hi kan tla chham tlang a hei hi kan nih tur ang min nih tir thei lo tu leh hlawhtlinna kawng min dalsak tu nasa tak niin ka hria.


18. Mizo ṭhalaite hian ngaihsan tur dik an ngaisangin i hria em?
- Tun dinhmunah chuan atam zawk hian ngaihsan tur dik tak kan ngaisang hian ka hre hrih lo a ni.

19. Ngaihsan tur dik nia i hriat:
- Pathian ṭih tu, ram leh hnam hmangaih kawnga hma la tu, tlawmngai leh mi tumruh harsa tak atanga hlawhtlinna kawng zawh tute hi ngaisang in an lak atang hian inzir ila aṭha ka ti.

20. Hlawhtlinna tura pawimawh:
- Pathian rin, thil tih eng kim a theih thawp chhuah, tumruh leh taimakna te.

21. Hloh i hlauh ber:
- Ka  Nu leh Pa leh Pathian ka rinna.

22. Hnam dang nupui pasal neih hi- 
- Hnam boral na kawng zawhna pakhat leh kan hnam pui te rilru tihnat leh hliamna nasa tak niin ka hria.


I thalaipuite tan fuihna--
-  Ka thalai pui te hi fuih chuang turin engmah ka ni hauh lo a, mahse Pathian hi bel a,kan thil tih engkima amah ring ngam turin ka fuih duh a chutih rualin, taima leh tumruh taka hlawhtlinna kawng bei a malsawm tlaka thawk tur leh  mahni  hnam  hmangaih leh hnam zia chawi nun hi changkanna ani tih ka hrilh nawn duh ani.


EXPLOREMIZORAM.COM i hmuh dan:
- Explore Mizoram hi a hlu ka ti a thalaite fuihtu leh hriatzauna min petu, beng tivar a chona nasa tak min siam saktu  niin ka hria a, changkanna rahbi pawimawh tak in niin ka hre bawk a in kal leh zel na turah pawh duhsakna ka hlan mawlh mawlh a cheu 🙏🏻😊.






Founder/Editor
Explore Mizoram

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]



(Website leh a hnuaia fakna hi lo hmet ve rawh.)

Post a Comment

0 Comments