AMC huamchhung inkharkhip chhunzawm dawn lo?; Nov 23 thleng COVID-19 No Tolerance Fortnight khauh takin kalpui dawn

Aizawl | November 7, 2020: Aizawl Municipal (AMC) Area inkharkhip zawh hnu-ah kal zwel dan tur ngaihtuahin nimin khan sawrkar mi pawimawh an thukhawm a, meeting hian lockdown zawh hun, November 9 zing dar 4:30 atanga November 23 zing dar 4:30 thlenga AMC area-a COVID-19 No Tolerance Fortnight kalpui tur tih chu khauh taka hman turin a nemnghet a ni.

Meeting hi Health & Family Welfare Minister Dr. R. Lalthangliana'n kaihruaiin, Home Minister Pu Lalchamliana, MOT Chairman Dr. ZR Thiamsanga, MLA bakah Chief Secretary, Mizoram Kohhran Hruaitu Committee, Jt. NGO Coordination Committee, Indian Medical Association aiawhte telin sawrkar official pawimawhte an tel bawk a ni.


Meeting-ah hian AMC area a inkharkhip hun a zawh veleha COVID-19 No Tolerance Fortnight hman zui tur chungchang uluk taka sawiho a ni a, hemi hun chhunga inkaihhruaina tur atana pawimawh chi hrang hrang lirthei tlan dan tur, dawr hawn dan tur, thil man to lutuk chungchang leh thil pawimawh chi hrang hrang sawiho niin, State Executive Committee, Mizoram State Disaster Management Authority kutah a rang thei ang bera an duan fel turin an dah a, an ruahmannate Chief Minister Pu Zoramthanga'n a pawmpui chuan November ni 9, 2020 zing dar 4:30 atanga November ni 23, 2020 zing dar 4:30 thleng khauh taka kalpui a ni dawn niin sawrkar thuchhuah chuan a tarlang.

Nimin meeting hian mipuiten inkharkhip leh COVID-19 No Tolerance Fortnight kalpui mek tha taka an thlawp avangin lawmthu an sawi a, COVID-19 positive te phur thintu ambulance driver, rim taka tlaivar thak thaka hahchawl hman lova thawk thinte an chhuanawm thu an sawi a. Hunpui lo thleng chho turah mitin kan fimkhur a tul zual a ni tih inhre thar turin an chah a, a bikin mi tlemte punkhawmna ang chi - hla zir, chaw eikhawm, picnic, party, zaiho leh a dangte laka insum rih turin an chah nawn a ni.

Integrated Disease Surveillance Programme (IDSP), H&FW report danin AMC area lockdown chhung hian sample 14,119 test a ni a, heng atang hian COVID-19 positive 510 (3.6%) hmuhchhuah a ni. Positive 510 hmuhchhuah zinga 33.33% hi natna langchhuak (symptomatic) an ni. October thla chhunga contact tracing tihna atanga COVID-19 positive hmuhchhuah 35.14% chu natna langchhuak (symptomatic) an ni a. Hemi hun chhung hian frontline workers positive 14 hmuhchhuah an ni a, an zinga 11 hi natna langchhuak (symptomatic) an ni. Naupang kum 10 hnuai lam positive hmuhchhuah zat hi 25 a ni a, kum 11 - 20 inkar positive 40 hmuhchhuah niin naupang kum 1 hnuai lam positive hmuhchhuah 4 zinga 2 hian symptom an nei a ni. Kum 61 - 70 inkar positive hmuhchhuah 20 zinga 11 in symptom an nei a, kum 71 chung lam positive hmuhchhuah 14 zinga 5 in symptom an nei a ni. Lockdown chhung hian AMC huamchhunga Local Council 83 zinga 57 ah positive hmuhchhuah an ni bawk.

Health department hnuaia Contact Tracing Team-in October thla chhunga an hmalak dan report pe in Zirna In hrang hrang 25 ah positive 160 hmuhchhuah an ni a. zirlai 132, zirtirtu 15, non-teaching staff 9 leah coaching kal 4 an ni. October thla chhunga positive hmuhchhuah 959 zinga 393 (40.99%) hi natna langchhuak (symptomatic) an ni a, damdawi in kaihhnawih positive 58 hmuhchhuah niin Damdawi in leh Sub-centre hrang hrang 24 ah positive hmuhchhuah a ni. Tunah hian hri kaina chhui harsa 78 an awm mek thu report a ni bawk a, Police Contact Tracing team pawhin hri kaina chhui harsa 24 an neih mek thu an report bawk.

Aizawl district-ah CCC hrang hrang mi 870 enkawl theihna a awm a, tunah hian mi 322 enkawl lai mek an awm a ni. Zoram Medical College (ZMC) ah COVID-19 positive enkawl lai mek 88 awmin an zinga 4 hi naupang an ni a, ICU-ah 5 awmin an zinga 3 hi ventilator hmanga thawk tir an ni. ZMC a enkawl mek zingah nau hring pathum an awm a, an zinga pakhat hi positive enkawl lai mek niin, midang pahnih hi rinhlelh enthlak lai mek an ni a, vanneihthlak takin nausen piang te hi COVID-19 an negative vek a ni. ZMC a damlo enkawltu daktawr leh nurse bakah driver leh thawktu dangte an indaihloh sawt hle thu tarlan a ni bawk.

Post a Comment

0 Comments