Zemabawk leimin vangin kawng ping; In leh Lirthei a hnawl

Aizawl | October 6, 2020: Vawiin chawhnu dar 3 pelh hlek khan Zemabawk Petrol Pump thlang deuh, Kawngpui (Lunglei Road) chu minin kawng a ping.



Lei minna hi Beraw Tlang Tourism Building zawn vel niin, leimin vang hian Concrete inchhawng pakhat a chim vek bakah in dang pawh tawlh thlak pui a nei bawk.




Thudawnna leh video darh-a a lan danin, Kawng sira City Bus leh 800 Car ding pawh a tawlh pui bawk. Thi leh hliam Report hriat a ni lova, kawng a chhiat tel bakah a tlang rih lo. 
 
A bul vela cheng chhungkaw thenkhat an inthiar chhuak nual niin thu dawn a ni a. Champhai-Lunglei tlangdung kawng a ping mek bawk.

Chhiatna thlenna hmun hi Chief minister leh bialtu MLA ni bawk Zoramthanga chuan a rang lamin a tlawh nghal  a ni.

Zemabawk Kananthar venga chhiatna thlenna hmunah hian kumin Frebruary ni 2, Pathianni chawhma dar 11 velah khan kawngchhak lam kawng ana mimal in sain a laih vangin chhak lam lei chu a rawn che vak mai a. Hemi tuma lei tawlhah hian in luah lai pakhat a chim a, in engemawzat luah ngam lohin a lo awm tawh a ni.

Helai hmun hi Berawtlang Tourist resort hmarlam kawmthlang zawn thla niin, a leilung hi tunhma lam atanga che fo thin a ni a, lei nghet lo a nih avangin khawtlang hruaitute pawhin in rit tham sak rem an ti lo va, hmunhma indaih lohna avangin assam type in lian lo te te erawh lei tlamuk tawha ngaihah engemawzat a ding. Ruahtui tlak tam changin, a khat tawkin lei tawlh avangin helai hmunah hian kawng a tlang lo fo thin a ni.

Tunlai ruahtui tla nasa avangin helai hmun hi a che leh a, nizan lamah pawh lei tawlh hian kawng a rawn block leh ta a, theih ang anga haifai a ni a, motor te kal tlang theihin siam a ni. Lei hi a chet deuh reng avangin lei tawlhna zawn leh a bulhnaia in luahtu te pawh an awm a nuam chiah lo chungin nizan lamah an la riak hlawm a, lei a chet zel avangin vawiin khan an unluah atangin an insaseng hlawma, vawiin chawhnu dar 3 velah khan chhak lam atanga lei che chu nasa taka rawn tawlhin kawng ana RCC buiding chhawng 3-a sang chu kawng thlang lamah a hnawl liam ta mai a, a bula pucca building pawh dinhmun tha lo takah tunah hian a awm mek a, Assam type luah loh in pakhat a ti chhe bawk.

He lei tawlh hian kawngpui sira ding city bus pakhat leh maruti 800 pakhat chu kawngthlang lamah a hnawl liam bawk. Mihring thi leh hliam an awm lo.



[Thu kal lai a nih vangin update mek a ni a, screenshot/copy mai lovin link i lo share hram hram dawn nia.]

Post a Comment

0 Comments