STATE TE HNENA GST COMPENSATION PEK DAN TURAH THU TLUKNA SIAM THEI LO

Oct 06, 2020:  42nd GST Council Meeting nimin Thawhțanni a lang biakna (video conference) hmanga Union Finance Minister Nirmala Sitharaman leh MoS Anurag Thakur hoa darkar 8 chhung zet  neihah chuan state te hnena GST compensation pek dan turah lungrual tlanna a awm loh avangin October 12 a ngaihtuah nawn leh turin an dah rih a ni.

 

Thu hma:
GST Council meeting, August 27, 2020 neihah khan hri pui len avanga Sorkar chhiah hmuh zat tur anga chhut nasa taka a phak dawn loh avangin, Central chuan state Sorkar hnena sum pek dan tur rawtna kawng hnihin (two options) a siam a:
Option  No 1 : RBI ațanga special window facilitated hnuaia Rs. 97,000 crore state in a puk ang. 
Option No 2 : Rs.2.35 lakh crore market ațanga state Sorkar in a puk ang. 

Hemi chungchangah hian state 20 te, BJP leh a thu rualpui te (Mizoram tiamin) chuan Option No 1 hi an thlang a, Opposition Sorkarna state te chuan a eng zawk mah mah an thlang lo a, Central in State hnena sum a pek theihna hi a eng zawk mah mah hi an duh lo a ni.

Council thu a rual lo
Opposition Sorkarna state te chuan State in sum puk loin Centre zawk hian compensation deficit Rs. 2.35 lakh crore hi a puk zawk tur a ni, an ti thung. 

Centre hian state te sum hmuh zat tur chhut chhuahna atan leh state  sum hmuh tur țhanna 7% anga pungin a chhut a, Rs. 97,000 crore in a chhut chhuak a, 7% ațang hian 10% a tipungin Rs. 1.10 lakh crore in a sang ta a ni. 

Opposition rorelna state te erawh chuan tun tangka kum chhung ngei hian state te hnenah compensation hi a pumpuiin Centre hian pe se, chumi tur chu Centre hian sum a puk mai rawh se, tih thu Kerala Finance Minister Thomas Isaac chuan a ti. 

Compensation chungchang hi Bihar Deputy Chief Minister Sushil Kumar chuan, State 20 ten option 1 an thlang tawh a, kar khat dang inngaihtuahna hun pek an ni a, rem an ti lo anih chuan vote kan la tawh ang, a ti. 


Finance Ministry hnuaia official-in  attorney general ngaihdan a sawi dan chuan, GST Council hian Centre hnenah state Sorkar te sum pek theih dan tur hi thlen mahse, Article 293 thu angin Centre hian thu tlukna leh ngaihdan siam theihna a nei a ni, a ti. Chuvangin GST Council thu tlukna hi state te hnena sum puktirna atan a ngai kher lo. Article 293 anga state in sum puk tur chuan state Sorkar hian Department of Expenditure an dawr mai zawk tur a ni. "State Sorkar hnena sum puktir tur hian GST Council pawmpuina leh remtihna a ngai kher lo," official chuan a ti. 

Finance Minister Nirmala Sitharaman chuan kumin chhunga cess collection tling khawm Rs. 20,000 crore chu state te hnenah sem nghal a ni ang a ti. Integrated GST ațanga sum sem tur awm Rs.24,000 crore erawhchu, karleh lama GST Council meeting ah rel a ni ang a ti. 

GST Council hian kum 5 chhunga June 2022 piah lam thleng luxury item leh sin goods (zu etc) ațanga chhiah (compensation cess) lak zel chu rem tih a ni. 

Source:
Economic Times 
Indian Express 
Live Mint

====06==10==20==
Huna Kawlvawm

Post a Comment

0 Comments