US PRESIDENT TRUMP LEH A NUPUI MELANIA-IN COVID-19 AN KAI TIH FINFIAH

Oct 02, 2020: US President Donald Trump leh a nupui Melania Trump te chuan   Covid-19 an kai tih vawiin Zirtawpni hian finfiah a ni.


 _“Kan innkhunghrang țan a, kan dam leh thuai beisei phawt ang,”_  tih thu Trump chuan Twitter kaltlangin tukin dar 10:42 IST khan a sawi a ni.

He hri  President Trump-an a kaina chhan chu amah tanpuitu zinga hnim hnai bertu Hope Hicks-i hnen ațanga kai chhawng nia hriat a ni.

Hicks-i hi President Trump-a țanpuitu țangkai leh amah hnaih taka khawsa reng a ni. President Trump hnung zui deuh chawt a ni a, inthlan campaign-naah pawh a President Trump hnung a zui rengtu a ni.

Tun Thawhlehni pawh khan President Trump-a presidential debate zawh hnu khan   Air Force One  helicopter President chuanna bikah khan chuang vein  Cleveland ațanga a ruala haw zingah a tel ve a ni . Nilaini khan President kalna  Minnesota lamah  campaign intawhkhawmnaah a kal ve leh bawk a ni.

Amaherawhchu, Trump hian he natna hri  Hicks-i hnen ațanga kai a ni chiah em tih finfiahna leh tih chianna tak chu a la awm lo thung a ni.

Coronavirus hi  Hicks-i kai hma hian White House thawktu engemaw zatin an lo kai tawh a, chung zingah chuan, Katie Miller, Vice President Mike Pence press Secretary te , national security adviser Robert O’Brien leh  President enkawltu bik (personal valets)  te chuan Covid-19 hri hi an lo kai tawh a, tunah chuan an dam tawh hlawm a ni.

Worldometer in a chhinchhiah dan chuan tukin dar 9:35 thleng khan US ah hian hri kai 74,94,947 an awm a, 2,12,660 in hri avang hian nunna an chan tawh a ni.

Vote thlakna atan ni 31 chauh a awm tawh a, inthlan campaign ngawrh țul vanglai taka hripui a kai hi a vanduaina thlen tur nge ni ang, khawngaih vote a hmuh phah zawkna tur tih chu America mipui thinlungah a awm a ni. 

Source :
Hindustan Times 
October 02,2020
@ 10:54 AM IST

===02==10==20==
Huna Kawlvawm

Post a Comment

0 Comments