Social Media-ah thudik tawklo thehdarh lo turin Kolasib DC in mipui ngen

Aizawl | October 18, 2020: Kolasib DC chuan Vairengte leh Lailapur inkara buaina thleng chungchang-ah Social Media-ah thudik tawklo thehdarh lo turin mitin a ngen.

Thuchhuah chuan, "Vairengte leh Lailapur inkara buaina thleng chu boruak a pangngai leh tan mek a, hetianga zawi zawia boruak pangngai chho thei anih laiin mi thenkhatin Social Media-ah thudik tawklo vawrh darhin, mipui inpunkhawm zawnga thil thehdarh a tam hle a. Hei hi buaina lian zawk chawk chhuak thei, mipui himna tichhe thei thil pawi tak anih avangin, Social Media-a thudik tawklo thehdarh lo turin mitin kan inngen a. Hetianga muanna boruak tichhe thei zawnga thudiklo thehdarhtute hi chhuichhuah a, a tul anga hremna pek an ni bawk ang." tiin a tarlang a.

"buaina thlenna hmun Vairengte hi tumahin pankhawm loh nise kan duh hle a, thil tul ang ang Sawrkarin a ruahman a, awmze nei taka thil kalpui anih dawn mek lai leh boruak tha zawnga a inher chhoh mek laia, tul loa mipui punkhawmna hian mipui himna a tihchhiat theih avang leh State dang leh Sawrkar laipui mithmuhah pawh thiam kan chan loh theihna tur, Mizo hming tichhe zawnga chet palh theih anih avangin Sawrkarin ruahmanna a siam a kaltur a tihte chauh lo chu Civil mi tumahin Vairengte hi tlawh rih lo turin kan in ngen tak meuh a ni.' a ti bawk.