Mizoram veng turin Gorkha thalai thawkchhuak; Mizo unaute leh NGO-te rualin an au hla zawmin an kiangah kan ding nghet tlat - MGYA

Aizawl | October 18, 2020: Mizoram Gorkha thalaite chu Mizoram chhan turin vawiin khan Vairengte an pan a. Gorkhali thalaite hi tanpuina hlan tur nen  an thawkchhuak niin exploremizoram.com in thu a dawng.

Mizoram Gorkha Youth Association (MGYA) chu Gorkhali Lukhum khum ngei khumin Khukri hriam tawk nen Mineral Water, Medicine, Sanitizer, Mask tam tawk leh anmahni sum hmang tur ₹ 35000/- leh tanpui ngai te tanpui atan poisa hran ₹ 40000/- chuang nen Vairengte an pan mek a, Aizawl atang hian mi 20 vel an kal a, Kolasib leh a chhehvel atang pawhin kal an awm nual tawh niin thu dawn a ni.

Mizoram Gorkha Youth Association (MGYA) general secretary Vinod Chhetri chuan, "Vairengte-ah a tul anga thawk turin Aizawl atangin mi 20 vel motor panga-in an kal a, Kolasib leh a chhehvel atang pawhin kal hi an awm nual tawh niin kan hria" a ti a. "A hmunah kan unau-te thahnem tak an awm tawh bawk," a ti.

Mizoram Gorkha Youth Association (MGYA) chuan thuchhuah siamin, "He hun khirh tak kan tawn mek-ah hian kan Sawrkar, Mizo unau te leh NGO-te rualin an au hla  zawmin an kiangah kan ding nghet tlat a ni." an ti.

MGYA chuan, "Mizoram leh Karimganj/Cachar District a Assam nen a ramri a buaina thleng hi Mizoram Gorkha te chuan pawi kan tiin Karimganj leh Cachar District a dan leh thupek keng kawhtute chet dan hi kan dem takzet a ni." an ti a.

"Nizan a Vairengte leh Lailapur bawr a buaina thleng a kan Mizo unau hliam tuar an awm te hi hriatthiam a har in pawi kan ti a kan tawrhpui tak zet zet a ni. He hun khirh tak kan tawn mek-ah hian kan Sawrkar, Mizo unau te leh NGO-te rualin an au hla  zawmin an kiangah kan ding nghet tlat a ni." an ti bawk.

 

MGYA chuan, "Mizoram bak keini Mizoram Gorkha hian ram tih tur kan nei lova, chuvangin, ramri humhalh kawngah a tulna apianga kan Mizo unaute ruala ke pen turin kan inpeih reng a ni tih kan Mizo unau ten min hriatsak turin kan duh che u a ni. Ramri chinfel kawngah rang taka hma la turin thuneitute kan phut bawk a ni." tiin an thuchhuah-ah an tarlang.

Mizo hnamin, Hnam issue kan neih apianga Mizo tana ding ṭhin Gorkhali te hi Mizoram buailai pawh khan mi thahnem tak an lo rammu tawh a ni.

1966 a rambuai ah pawh Gorkha hnam eng emaw zat rammu ah an tel a, Nizana kan buaina ah pawh Vairengte a kan Gorkha thalai enge maw zat ramri buaina ah telin, Aizawl aṭang pawhin veng hrang hrang Gorkha ṭhalaite chu thuam famkim nen motor 5 in Vairengte an pan bawk. An pawisa thawh khawm Rs.30,000/ chuang zet, tui thianghlim intur motor trip khat leh damdawite pawh an keng nual. MGYA hian MZP hnenah ramri venna atan vawiin khan tanpuina an hlan bawk a ni.