Serchhip-ah Keite nia hriatin Kel tam tak sehhlum

Aizawl | October 10, 2020: Tunhnai khan Serchhip Bawngchawm khaw hluiah keite nia hriat chuan ran vulhtute Kel vulh tam tak a sehhlum tawh niin exploremizoram.com chuan thu a dawng.

Serchhip Bawngchawm khaw hluiah hian Serchhip Livestock Farmers' Cooperative Society ten kel vulhna hmun an siam a, heng an Kel vulhte hi Keite nia hriatin tam tak a seh hlum sak tawh avangin an mangang hle a, Forest department lamah an harsatna thlenin, Forest Deptt. lamin hma an la mek niin thudawnna chuan a tarlang.
 

Thudawnna in a tarlan danin, Serchhip chhim lama awm Bawngchawm khaw hluia Serchhip Livestock Farmers' Cooperative Society te Kel seh thintu hi Keisen niin hriat a ni a, kel 27 lai mai a seh hlum tawh a ni. Kel vultute hian Divisional Forest Office Thenzawl lam an hriattir a, theih ang anga tanpuina ngaihtuah sak turin an dil a ni. Forest department lam thawktute hi a hmunah kalin Keite ei bang leh Kel thi ruang thla leh Sa hniak thlate an la a, tanpuina awm theite ngaihtuahsak an tum a ni.

 

Serchhip Livestock Farmers Cooperative Society hian Kel 70 chuang an vulh a, nikum hmasa lama Saza hri (Goat pox) leng avang khan Kel 40 vel zet an lo chan tawh a. An indin thar leh tan mek tihin Keite hian an ran vulh a seh sak leh tak avangin an mangang hle a ni. An manganna hriaa nasa taka hmalaksaktu DFO Pi Margareth Lalramchhani leh Forest deptt. thawktu dangte chungah Bawngchawma Kel vulhtute hi an lawm hle a ni.

Post a Comment

He post chungchanga i ngaihdan lo sawi ve rawh:

Previous Post Next Post